當民憤好似火藥庫的時候,偏偏總有好多騎呢人出來倒電油,今次除了環境局局長的邱騰華之外,仲有港鐵呢班膠人。
行政長官指令威到可以唔理立法會,咁立法會仲用來做乜?咩叫沒有民主,就沒有民生呢?今次再一次係示範!垃圾堆填區的問題,就同幾個月前大陸廣州番禺的情況一樣,點解呢 D 咁關乎民生的問題,政府都要一意孤行?事實再一次證明,這位口說環保的局長,幾時有重視過環保?綠化地變垃圾地,之前同佢好老友的泛民議員,有冇後悔?
港鐵更騎呢,搞了一個「觸動人心」的廣告,硬銷獅子山精神,可是片中的角色卻只有闊太、醫生、經理與老闆,對今日絕大多數的年輕人來說,都係「發夢都冇咁早」的荒謬刺激,再一次證明,一班由老人家組成的「創意」,老到已經和時代完全脫節。
單係今年,地鐵先拆了乘客的座位,改為半企位,再把部份路程八達通的收費,調至高過單程車票,加上偷偷轉售八達通的市民私隱,加上年初和無恥政府合作搞高鐵項目,仲有市民切身利益的沙中線要讓路大陸人用的高鐵,一拖再拖遙遙無期,港鐵的形象跌到有史以來的新低點,佢地仲唔識死,仲要拍一套令人火上加油的垃圾出來,自焚好好玩嗎?
打你一身唔好意思囉,斬你全家唔好意思囉,仲有咩好意思呢其實?郊野公園變垃圾堆填區唔好意思囉,一世冇民主唔好意思囉,唔好意思囉真係好好用,成為特膠政府萬能 key 的最好素材!