「有壓力?所以我要裸跑!」這種偉大的理論,我永遠都唔明白,不過有一個更好笑的例子,又想同大家分享一下,就係我地傳說中的「內地運輸及房屋局局長」--鄭汝樺女士,佢的講法我又係諗極都唔通--鄭汝樺說,每日九萬九千人次的高鐵,以及高鐵帶來的盈利,都已經是保守低估的數字!我真係諗極都唔明啦,點解咁多年來,政府唔用起隧道的方式來起呢 d 必賺的生意呢?唔通政府要與民爭利?
拿拿拿,香港各條隧道、全部都有「利潤保證」,即係話賺唔夠錢就可以加價,加到你賺為止;高鐵係一條咁重要,值得我地洗六百幾億的鐵路;高鐵係一條咁重要,話香港唔起就會變孤島的鐵路,咁重要又點會冇錢賺呢?對,鄭汝樺不斷同我地吹噓,說高鐵係兩個字--賺梗!
必賺的生意,點解咁鍾意官商勾結的政府居然唔益親家,又或者益李家呢?我真係諗極都唔明!
拿拿拿,林忌有條好橋教政府,立即出來宣佈,高鐵賺梗的生意,佢地都唔益商家,事實證明香港係冇官商勾結o架!!!政府寧可自己出六百幾億,都唔肯畀其他商家投資呀!特區政府簡直愛死香港人呀!
再回帶睇一睇:特區政府新聞網:2005年6月15日 政府不擬回購大老山隧道專營權
「購回專營權影響負面
蔡淑嫻重申,基於小政府大市場原則,政府不擬回購大老山隧道公司專營權;而在2018年7月現有專營權屆滿前收回,對政府形象也有負面影響。 」
我真係唔明,原來用十幾億買隧道,就係違反小政府大市場的原則,原來小政府係嫌洗得錢太少!所以要投資六百六十九億,先叫做「大市場」的原則;嘩!個市場好大呀!大到冇一間公司肯去投資,要由政府全資投資呀!果然係「小政府大市場」,簡單而言,就係令你想「小」個政府,然後做大「商家的市場」,明哂!在香港連用中文,都係特別唔同o架!
另一方面,由於林忌就好似好多傳媒收左錢的人一樣,一定收左好多商家佬的錢,一定收左好多中共的錢,話唔定又有一樣出來裸跑,因此為左證明我收左錢有做野,林忌決定要為商家佬爭取權益!高鐵咁好賺,你點可以唔預班國企呀、高幹一份呀?
有咩好橋呢?好簡單,鄭汝樺成日話回購隧道要好多錢,連五億五千五百萬買番四成大老山的權益都出唔起,要任由佢畀西隧果間日日話蝕錢的港通控股買起,不如咁啦,政府蝕底點,出讓高鐵呢條「必賺」、「超重要」、「防止香港變孤島」的經濟重要鐵路的股權,去換取各大隧道的專營權啦!拿,就出雙倍!甚至三倍的高鐵股份,去換取東隧(只餘下七年)、大老道隧道(只餘下九年)的專營權啦!拿,佢地又話日日蝕錢要加價,又話回報率不理想,咁換條回報率勁理想的高鐵專營權畀佢地啦,點解要我地納稅人出錢先?鄭汝樺,你如果唔同佢地換股份,如果再走去延續佢地的專營權,你聽天收啦又。
鄭汝樺作為運輸局局長,點解日日塞車塞到阿媽都唔認得,你卻乜都唔做呢?嘩!爆哂呀!唔係運動會場,而係路面交通呀!架架貨車趕今日出貨,架架大陸旅途巴迫去舊隧,再加埋成街都係修路工程,嘩!好爆呀!市民日日都谷爆又迫爆呀,用唔知幾多億,就係令全港迫爆--除左個運動場之外,超勁呀!神級呀!
2003 年膠完一鋪維港巨星匯唔夠,2009 年仲要膠多鋪東亞運動會!呢 d 倒錢到瞓街的項目,可預見高鐵將來都係一樣;事實再再再再再一次證明,沒有民主,就沒有民生,成班貪官張牙舞爪,成班土共爭相搶劫,吹咩?香港人會反抗咩?
下面:笑笑就好,切勿認真......但 D 對白寫得好精警,我鍾意!