
然而在這點之外,為免被人誤會不夠膽,林忌決定提出一個更有創造力的方法,去解決部份泛民的憂慮,以及反制政府破壞公投的大計,方法就係,所有辭職參選的議員,人人都把真名改做「普選」。
舉例說,社民連的三位立法會議員,可以立即去更改自己的姓名,改做梁普選、黃普選、以及陳普選,幸好冇人姓吳,所以改了名之後,在選票的名單上,就會出現「梁普選、黃普選、陳普選」等的壯觀場面,令公投變得更具有說服力。
萬一土共避戰,方法亦很簡單,找五位泛民又收姓吳的支持者,一直改名做「吳普選」去參選,以我們廣東話為主體的香港社會,人人都知道吳、唔同音,所以絕對會分得清,究竟邊個係真普選,邊個係唔普選。
如果覺得只改名唔改姓唔夠喉,既然香港都冇限制名字的字數,索性改個長些的名,特別記得英文一定要改做 Universal Suffrage,更集體開一個新政黨,叫做「2012 雙普選黨」,直至公投結束,議員可以再改番名,呢個黨亦可以完成歷史任務而關閉,那麼公投的合理性就會好明顯,而且泛民各黨派亦唔需要擔心,又或者唔需要被老屈,話有人想借機坐大,係唔係?
支持參加公投補選的議員,連個名都改埋做普選,究竟大家投緊乜,就一清二楚。唔信你叫陳克勤之流,改個名叫做「天滅中共」,你估民建聯的支持者肯唔肯投先?改名字去變相公投,呢招就係令公投變得可行的必用絕活,甚至再簡單點,即使大家未傾得成公唔公投,如果社民連的三位立法會議員拿出決心,單係把自己的個名立即去改做「普選」,下屆立法會開會時,保皇黨鋪鋪都要叫你地做普選,令普選日日提、時時提、刻刻提,成件事都過癮十倍啦,你話係唔係?
你話做律師、大律師,改左個名好麻煩,大家都會明白;但係如果做全職議員,呢條橋比起絕食,最少健康得多,但效力就大十倍廿倍,特別係如果保皇黨避戰,我地仲可以搵 d 冇政黨又肯獻身的普通市民,改名埋做「唔普選」或者「吳普選」,成件事就代佢地做埋,係唔係最有效呢?
拿拿拿,泛民支持者係唔係要合作先?呢條橋咁好就冇理由唔用嘛,你話係唔係?