支持及訂閱請按 Like

星期六, 2月 07, 2009

稅務學會加稅發達美夢

星島日報:稅務學會倡重研消費稅

稅務學會估計,今個財政年度會錄得赤字,與政府估計的七十五億元相若,料○九年經濟環境欠佳下,政府在下個財政年度要制訂數百億元的赤字預算。該會認為目前未有空間減稅,並建議重新研究商品及服務稅以擴闊稅基。

稅務學會會長龔永德表示,該會倡議將目前低收入人士的交通津貼,由四區擴大至全港,預計政府每年要多付三十億元。但他稱政府不宜退稅及減稅,對消費券亦有保留。

該會亦建議一系列個人及企業稅務優惠措施,包括增加一項供養八十歲的父母或祖父母、每年一萬五千元的免稅額,醫療保險費可獲扣稅,最多每年三萬元,又建議深圳與香港政府,研究將薪俸稅率看齊,加強兩地人口流動。

我地香港有好多所謂的「專業組織」,例如功能組別果班既得利益者,在呢個政府無能廢柴的年代,在經濟越差的時間,就越打政府的主意,諗住官商勾結可以搵著數;由老董時代的大量利益輸送,到今日當奴時代的利益輸送,就係當我地香港人係傻仔。

上次立法會 IT 界功能組別議員提出用三十三億搞「智能交通運輸系統」,完全唔理現實香港冇路而用咩智能都係冇路的物理學限制,都只係講緊三十三億的「少數錢」;在面臨財赤之下,政府違反基本法精神都要撥一百二十幾億的錢入去四川,都「仲」係「少數錢」,但係稅務學會呢班友,在基層市民就來爆炸的時候,都仲死唔斷氣係都要搞消費稅,荒死個市唔死咁,點解咁急呢?呢班掛住「稅務學會」的「專家」,究竟有幾多理據呢?

最簡單,拿出佢地其中一個方案,就可以知道佢地有幾膠--「稅務學會會長龔永德表示,該會倡議將目前低收入人士的交通津貼,由四區擴大至全港,預計政府每年要多付三十億元。」同譚偉豪一樣係,佢都係想叫政府倒三十億落海,但呢三十億比起譚偉豪果筆更加不義,咩話?三十億「交通津貼」?

上次林忌在十二月廿四號寫大欖隧道加價果篇「逆市加價潮」已經指出,呢兩年政府畀天水圍交通津貼,結果作為天水圍出入口的大欖隧道的不斷逆市加價,小巴由三年前的 $60 升到 $100,雙層巴士由兩年前的 $75 升到 $120,升幅達六成以上,政府如果把低收入人士的交通津貼,由四區擴大至全港的同時,卻無法控制價格的話,結果只會造成「你派幾多錢,佢加幾多錢」的後果!最終不是政府補貼市民,而是補貼各種公共交通的公司、隧道公司!

對於呢個後果,稅務學會班大帝關心嗎?最好就好似「塞車官商勾結證據」篇文咁,搵一班人出來大力鼓吹「回購隧道」,同時 d 公司就大舉收購隧道股權炒起個市,然後再畀錢 d 打手上傳媒鼓吹,大力提倡要補貼低收入人士的交通費用,絕橋呀!發過豬頭呀!再加上銷售稅,由一大班大會計師行做會計核數做到手軟,一橋幾用!呢次發達啦!

係囉,呢 d 利益團體出來發膠音,乜好多傳媒唔係成日話自己中立,成日覺得要搵 d 相反意見出來平衡咩?偏偏呢 d 「扮中立」的傳媒,在呢 d 問題上從來都唔中立,從來都唔會搵相反意見的評論或者學者,去指出這些山埃毒藥建議的後果;就好似果 d 財經演員唱好某些山埃輪一樣,又或者連咩係雷曼都唔知就叫人買迷債的銀行職員咁,落足嘴頭呃小市民「落搭」,借「專業名義」去呃呢班無知的小市民!

係囉,呢位稅務學會會長龔永德係乜水呢?除左佢同保皇黨o既保皇黨陳茂波咁老友,一齊去民賤聯的講座「推廣銷售稅」之外,佢本身係四大會計師行畢馬威 (KPMG) 的合夥人!簡單而言,如果香港推出「全民萬稅」的「銷售稅」,呢班搞 Taxation 的生意就立即做極都做唔切,因為乜都要搵佢地計稅也!之前銷售稅畀全民圍攻,收歛左一排而家就換個名轉做「消費稅」借屍還魂,再派「全港低收入人士交通津貼」的糖來呃大家,引大家上釣;贏粒糖,輸間廠,佢地就發大達,市民就福大佳。咁多人叫我地香港人出來「共渡時艱」,呢班契弟就專出來「搵傻仔強姦」,希望各位傻佬唔覺唔覺,畀佢地呃到過骨。

當成行都係死市,連台灣都要派消費券去「救市」的時候,呢班契弟居然建議政府去「擴闊稅基」狂加稅?用加稅去救經濟?救邊個的經濟呀?全世界邊一派的經濟理論,係主張逆市加稅救經濟呀?香港呢班專業團體的無恥程度已經去到「神級」,比起無恥更無恥,甚至比起 X 建聯更加無恥!信 X 建聯係「信你一成,相目失明」,至於稅務學會,記係「認住呢個會,陷家o既保證」!

伸延閱讀:
譚偉豪博士超智能發明
塞車官商勾結證據
逆市加價潮
三條海隧早已飽和

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀