收到幾位網友報料,說香港多個新聞台,特別是免費電視的數碼頻道,在直播溫家寶在劍橋演講時,由於出現掟鞋事件,立即腰斬去播廣告。
第一個問題:溫家寶去劍橋演講,有咩新聞價值呢?幾個台都走去做直播,我真係唔明,今次演講有咩驚世事務要發表呢?香港有幾多個觀眾,對於佢去劍橋演講的內容,好有興趣呢?
演講的題目係「用發展的眼光看中國」,好明顯對像係鬼佬;我真係好想問,今日我地的香港市民,有邊個會用「發展的眼光」,去「看中國」呢?X 建聯同一大堆自稱愛國愛港的人士,成日話咩「沒有國,哪有家?」成日把國家比喻為佢老豆老母,我真係想問,佢地會唔會「用發展的眼光」的去望佢地老母?
係囉,諗下條題叫做「用發展的眼光看老母」,又唔知有幾多位「香港人」,會在深夜十二點起身睇呢個「演講」呢?我真係唔明,點解電視台又要做直播。
就當林忌冇乜市場觸覺,原來大家都好鍾意聽「用發展的眼光看老母」好了,咁突然在直播途中出現大件事,有人出來搞事,咁大單野老奉都要直播落去啦,係唔係?總理遇襲,簡直就係頭條新聞,比起講座本身大件事十萬八千倍,點解會突然腰斬直播,放廣告呢?假設有一日曾蔭權遇襲,被群眾掟臭雞蛋,我地偉大的電視台又會唔會把直播腰斬去放廣告呢?
再對比下有線電視新聞台的報導,記得上次布殊被人掟鞋時,報導的時間長好多,當係大事來報;今次溫家寶被人掟鞋,居然放在報導佢講乜之後;我真係想問,溫家寶講左咩詩詞,引左咩古文,同我地香港人有咩切身關係?佢在劍橋同鬼佬(理論上,應該係講畀鬼佬聽,但點解變哂中國留學生,自己知吧),講「用發展的眼光看老母」,同香港人有咩關係?大佬,溫家寶遇襲喎,國家總理遇襲喎,仲唔係頭條新聞?仲唔係比起佢講乜更加重要?點解同大陸一齊,封鎖呢單新聞消息呢?好多人在內地的 yahoo 新聞等,搵極都搵唔到呢段遇襲的「新聞」,發而係一大堆海外的憤青人人出擊,我真係唔明,我地香港傳媒,幾時變成咁o既款?
劉皇發抽下簽,報紙變左一細段;國家總理海外被掟鞋,報導仲少過美國總統被掟鞋,唔通美國總統比起國家總理重要?唔通佢地人人都唔關心溫總的安危?好奇怪呀!好不解呀!好不安呀!
唔講都唔知,經黃世澤提醒才知道,原來布殊被人掟時,成班憤青在大讚伊拉克記者做法很光明的同時,更在 QQ (國產 ICQ) 搞左個掟鞋的 Smiley。
唔知今次之後,掟鞋的 Smiley 會唔會違反國家安全法,會唔會被「和諧」(和諧社會的取締行為)呢?上次睇人掟得咁過癮,唔知今次佢地又過唔過癮呢?
(圖片:溫家寶遇襲後剎那)
伸延閱讀:
用發展的眼光看老母
掟鞋風度與大腳崛起
黃世澤:雙重標準的中國人