支持及訂閱請按 Like

星期五, 8月 29, 2008

改善塞車之事實勝於雄辯

長江中心秘道打通中環一天光晒
10 年塞車頑疾紓緩 司機乘客叫好

【本報訊】中環長江集團中心的行車秘道曝光後,昨日被迫無條件對外開放,吸引大量駕車人士使用;由皇后大道中前往花園道,交通時間足足快四倍,疏導了中環擠塞的交通,司機乘客齊聲叫好。有中西區區議員與駕駛人士批評,長江中心過去 10 年令中環交通擠塞問題惡化,政府後知後覺。

中西區區議員甘乃威表示,長江中心的前身希爾頓酒店未拆卸時,皇后大道中最左線可供行車, 但現時規定要左轉入長江中心,變相令中環的交通擠塞惡化,「依家焗住要左轉,司機去到長江中心都要轉線,搞到逼埋一邊交通擠塞。」

在中環「搵食」之的士司機梁先生稱,平日乘客在長江中心附近上車往半山,要兜路經皇后大道中、雪廠街等才到紅棉路,需時近半小時及車費 30 多元。但現時改經長江中心,10 分鐘便到半山, 車費只需約 20 元。另外,日後若遇上海旁大塞車,乘客要由中環前往灣仔,也可選擇走這條捷徑先上半山,經堅尼地道往灣仔,節省 10 至 15 分鐘車程及約 10 元車資。

的士司機從業員總會副主席馬松龍指,每晚下班時段,中環每輛的士平均來回半山區四、五次,日後的士可經長江中心的秘道來往半山,將對中環擠塞有所改善。香港汽車工業學會會長何懿德與理工大學土木及結構工程學系副授熊永達也認為,皇后大道中是中環交通擠塞的樽頸位,經常塞車及行車緩慢,現在多了一條道路往花園道及半山,可大大疏導交通。

一次、兩次、N 次,林忌說塞車的問題,是來自樽頸位的硬膠道路設計,大部份泛民與建制派議員,以及一眾政府的大帝,都當是耳邊風;長江中心的道路一打通,乘客、司機到專家都人人讚好;那些研究小組,那些說必定要搞「電子道路收費」的契弟,今日o係邊?

最契弟的人,就係自己唔做研究,唔去前線觀察,關埋自己對眼,用自己自以為的常識,然後就狂吹亂作,做完又唔負責任,唔敢去迫政府建新路,唔去追查權貴有冇濫用空間與道路,就一味鼓吹要收錢,有錢人行哂就唔畀窮人行,仲美其名為環保添。

唔知何秀蘭對長江開條新路有咩睇法呢?何秀蘭反對建灣仔繞道,理由係多左路就會多左車;今日長江中心開左條新路,用佢的理論,未又多左車囉?咁係唔係應該叫政府把土地送畀長江,等佢地封路去減少車輛呢又?

日日下午兩點幾三點,灣仔北告士打道一帶,就塞到人人行時速 20;點解塞車?五六線的車互相 cut 線,有車要出灣仔,有車由灣仔入來;有車要行左線去紅綿道上半山,有車要 cut 右線去中環;cut 來也 cut 去,道路欠缺良好的接駁,明明唔需要塞車,就變左塞車;一過金鐘樽頸位,塞車就幾乎消失不見,這樣明顯的事實,偏偏偉大的議員與官員,就好似盲左一樣視而不見;好似盲左一樣,死口話車一定太多,死口話要收九十蚊一程,先可以減少塞車,死口對倫敦搞電子道路在 2008 年已經幾乎完全失敗的最新數據,視而不見;仲敢企出來反對灣仔繞道,有冇搞錯呀?

支持繞道,絕對唔代表反環保;繞道有好多種起法,亦唔一定要填海;由中環去銅鑼灣,而家唔少搵食司機,一去到添馬艦就左轉,然後行海邊果條小路東行,過左灣仔碼頭遇到馬師道加氣站排隊入氣,先變番塞車--事實證明,如果冇樽頸位,如果政府用議員多花心機,即使少少改動都可以有多多改善;灣仔北即使唔填海,收地就可以解決問題--搬走金紫荊,收回灣仔碼頭巴士站空地(改建)、愛護動物協會附近的氣站、土地、狗公園全部改建,都可以立即起到一條臨時的灣仔繞道,誰說一定要填海?就算填,也只是填極少量的土地或高架橋,係睇有冇心去改善問題,而冇話做唔到囉。

望望張單張,咩話?自由黨?講到口水都乾,搞搞下居然係自由黨港島區的候選人肯虛心研究同學習,如果唔係佢個黨在民主立場唔堅定,林忌都心動想投佢一票...... 泛民之中,係得甘乃威講得出,原來長江中心對皇后大道的影響,因此更加清楚,林忌決定投甘威。

如果你唔認同林忌的民主立場,卻又認同每日一膠的反膠立場的話,不妨考慮下,呢位一號的自由黨候選人,幫佢度橋果位,相信係高手。

先旨聲明,我寫呢篇文時,既唔知亦唔識呢位高手--第日就唔敢講;費時搞搞下,一陣又傳林忌疑似入左自由黨就唔好啦。

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀