支持及訂閱請按 Like

星期三, 8月 27, 2008

港島不投二五九!

長江集團中心行車隧道屬公家路 唯車輛須取票方可通過
2008-08-27 HKT 11:26

政府公布新一批附有公共空間的私人發展項目,當中包括中環長江集團中心一條連接花旗銀行大廈,往返紅棉道的行車隧道。但有的士司機表示,從不知這隧道屬公家路。

地政總署表示,已派人到場了解情況。

隧道今日開放予所有車輛使用,但隧道入口掛著「持有隧道通行證者方可進」的指示牌。

有保安員表示,要在管理處取票後才可通過,但不用繳費。

有駕車人士說,開放隧道後有助舒緩皇后大道中的擠塞問題。

世紀奇聞,原來長江集團中心行車隧道,原來是公家路!

原來有無數官員、議員、討論塞車問題的小組研究了 N 世,都唔知道原來解決塞車的其中一個最有效的方法,就係取回政府應有的公家路!

咩世界呀來o架呢個?咁都可以發生?膠港係咩地方來o架?香港研究左 N 世,又話中環塞車要搞電子道路收費?點解?原來就係因為最塞的皇后大道中,旁邊條可以解決擠塞的公家路被長江集團「非法私有化」左,唔怪得塞車啦!

原來講來講去,要收九十蚊一程,仲有泛民主派朋友拍掌叫好的收費方案,居然係因為監管不力,自己硬膠引致;原來係因為政府可以把公家的隧道變成私人停車場使用,真係地球唔滅亡果日,都一定有膠聞。

「冇路行呀!」--原來係公路被私佔;「要減少車輛呀!」--原來係要畀有錢佬行哂。

打出所謂關心民間疾苦,所謂反壟斷果 d,唔知點解反左咁多年,都冇發現原來紅綿道旁的路,被長江集團壟斷左呢?

每日三點鐘起,告士打道由天后塞到去金鐘,港島東西交通塞爆斷哂;點解?全部塞在樽頸位囉;中環日日返工時間,點解?都全部塞在樽頸位囉!一過樽頸位,全部通哂。

點解會有樽頸位?例如灣仔馬師道的樽頸位,就係由於政府專用加氣站收費特平引致;灣仔加氣站平過柴灣,所以各路職業司機人人去灣仔入氣;點解中環塞車?因為明明有疏通的道路,卻被公地私佔,成班契弟冇人落去做研究,冇人去做調查,關起對眼,然後大叫:一定要做手術切除!一定要唔好開車!

因此,作為港島區的選民,林忌公開呼籲各位,港島區,不投二五九!

灣仔塞車塞到全港島人都唔認得,二號的何秀蘭女士,居然反對起灣仔繞道;禁止灣仔賣貨,禁止灣仔送貨囉?如此智商的人,重返議會來做乜?同葉國謙一齊重返議會?是誰在觀龍不戰而降,放葉國謙一馬?連區議會都不負責任,連以灣仔為基地的公民起動成員,都可以不理灣仔的塞車問題,呢位反智的女士,重返議會只會累死民主派--如果講基層,點解唔投阿牛?阿牛的承擔,阿牛的負責,阿牛的關心基層,有邊樣野差得過何秀蘭?最少我深信,如果職業司機講塞車苦況,阿牛會出來幫忙,而唔係出來發膠風,講話唔使起路,開少 d 車的硬膠智商;阿牛,有智慧過何秀蘭 N 倍。

如果想要更高層次的思維,點解唔投甘乃威?係,佢係唔識講野,但佢識做野--泛民主派中西區區議會保存 2003 年的六席,地區工作證明一切,點解唔畀一次機會甘乃威?

當然,余若薇入議會都好重要,因此如何配票,如何支持港島區的選情,就由選民你們自己決定;林忌公公道道,三個都支持,唯一唔支持,就係那個一再反智的 2 號。

勞永樂?唔好問我啦;問最初誰推佢出來同陳方安生鬥,成功轉型做民主派果位啦--當初林忌反對勞永樂,被某人痛罵九條街;所以我而家唔敢再鬧勞永樂o架啦,問當初支持佢果位啦。

伸延閱讀:
馬桶令排泄增加--硬膠泛民唔理塞車的原因
塞車始終有你--灣仔北爆塞車的原因
觀龍陳太勝葉劉--點解何秀蘭不戰而逃?
曾建成的努力
國際硬膠都會 Yo! Reginababy!
福佳有理:泛民協調機制=民主選舉?--當年反對勞永樂出選的文章
我們都是茂利--呃完一次又一次

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀