支持及訂閱請按 Like

星期四, 12月 20, 2007

組織落海論

記得年初時,林忌和李兆富有段對話,講講大家最憎的是甚麼。

林忌最憎甚麼,大家應該耳熟能詳,不再討論了;可是李兆富最憎甚麼,卻和今日這篇文大有關係。

李兆富說:「我最憎就係果 D 官僚組織,一日到黑只係掟錢落咸水海;組織最乞人憎係,唔係洗錢就算,洗洗下發現自己好似有少少無所事事,就會不停推出一些所謂改革建議,等自己可以繼續無限擴張落去,永無停止的一日」。

就係咁樣,特區政府及所有官僚大帝,例如旅發局、 XYZ 局,掟左咁多錢落咸水海,偏偏民生最重要的事,例如基建、鐵路等,就當冇一回事,一句推哂:「技術上不可行,財政上不可行」。

原來講左幾廿年的南港島線,拖到 2015 年完成,都只係需要 70 億...70 億要拖到今日先動工,同我地講政府冇錢做?呢 D 應該使的錢,卻要市民忍受咁多年?咩政府來o架?

政府求其一筆錢,例如 1998 年的「電腦裝在廁所」的中小學買電腦計劃,都用左 26 億啦;唔夠三四年呢批電腦就變哂廢鐵,仲有咩持續進修基金,優質教育基金,好多唔知咩金,鋪鋪都俾出面一大堆 claim 政府錢的鑊鑊金,偏偏就要我地塞車塞到如今。

點解呢 d 就捨得,真正改善市民生活的就唔捨得?

同樣,政府洗左幾多冤枉錢去起迪士尼?如果你真係關心經濟民生,迪士尼起鐵路與樂園重要一些,定係港島南線重要一些?

另一堆膠論說,港島太多人啦,所以除左搬之外,冇方法解決。

我支持,政府搬總部去沙頭角,搬國金一、二期去天水圍,搬地產商的大廈去元朗囉不如,咁就唔會來港島返工了。

在此之前,市區的交通問題,都要做野o架,係唔係?回歸頭五年做緊乜?起條路起條橋,比起個迪士尼難咩?

搬得到旅客唔去港島咩?搬得到跨區返工的問題咩?搬唔到,就專心搞好交通基建。

當金鐘/中環站嚴重爆滿之時,當港島有超過一半人住東區之時,偏偏偉大的政府又唔加建舊隧,又唔興建鐵路駁北角到紅磡,更任由地鐵為求將軍澳樓盤的收益,強迫鐵路轉停油塘站,令大批市民白白浪費寶貴的光陰。

呢班係乜野官僚?

起路就用來擴張賣樓;叫佢改善交通基建,佢就建議你搞收費然後再變出一個「道路收費局」出來,洗哂你 D 錢,就話連醫病都冇錢,要你自己供埋佢,其實係養活佢地班膠人。

成個南區得三條路出市區(唔好計大潭水塘條路啦掛?)點會唔塞車?成個中環都冇高速公路,又點會唔塞車?港鐵任由月台空氣污染指數百幾唔改善,任由列車塞到滿哂,個個都迫到阿媽唔認得果時,叫班高官日日坐囉,佢地肯唔肯?

呼籲市民乘坐公共交通工具之餘,撫心自問,你地覺得公共交通工具的感覺,舒唔舒服?點解要搞到「坐車」變成「企車」係常態(即使係非繁忙時間)?如果坐小巴、巴士要綁安全帶,安全帶咁重要,政府敢唔敢規定,全香港的巴士乘客,都要綁安全帶先準坐車?當巴士乘客連安全帶都冇時,就證明了,現實令「生命安全」呢個咁重要的道德價值,都要放埋一邊,點解?

偏偏我地由議員到班官,眼中只有一堆膠制度,只知道紙上談兵,落手落腳關心一些急切、切身問題的,一個關乎民生最切底問題的,完全冇人理。

冇錢?炒哂班膠官夠做哂以上堆野有餘啦!

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀