支持及訂閱請按 Like

星期五, 11月 23, 2012

僭建政府毀滅公務員體制的大計

十月十八日東方日報:『特首梁振英指香港不能再只談政治,不談經濟,望社會能「內外兼顧」、「政經兼顧」,他又批評香港過去奉行的「積極不干預」及「大市場,小政府」經濟政策,已不合時宜,未來政府在經濟發展的角色須「適度有為」,推動香港金融業及航運業多元發展,加強港府駐內地及駐海外辦事處的工作,扮演類似外國大使館的商務參贊角色,積極協助港商及港人發展。』

看過這段新聞,大家會想到甚麼?噢!好野!梁振英會打救香港啦!梁振英會發展「大政府、小市場」打奸商啦!梁振英會解決香港的貧富懸殊啦!等等,閣下係梁粉,定係神智不清?梁振英講野,你都信?

冇錯,梁振英係推動大政府,不過佢目的唔係泛民左翼心中所想的扶貧,而係執行黨的任務,傳說中四大任務中都未包括的--粉碎公務員體制,成立港共僭建政府的任務;早幾日邵善波出來自爆,請高靜芝擔任中策組擔任全職顧問,插手政府各委員會招聘人員,就係其中一例!「梁朝」以大政府為名,就係想繞過英治年代彭定康所歌頒的公務員體制,把政府改組成為一個共產黨直屬機構;對於港共政府來說,奪權是他們唯一關心的事情,因此無論大政府小政府乜政府,都只係佢地口中的藉口,除非閣下到今日,仍然對梁振英有幻想。

港共政府明知要改組公務員體制,以及英治年代的傳統,必然遇到大量阻力,有如報紙報導的「林林權鬥」,就是其中一例,因此港共政府要達到目的,必要得到其他力量的支持,包括泛民主派的支持--君不見何喜華、陸恭蕙、張炳良,他們都選擇相信梁振英嗎?君不見選舉初期,不少泛民左翼也曾對梁有所幻想,以為他會對商家開戰嗎?開一張不會實現--打地產黨的期票,一些天真人士就已經仆倒相信梁特係救世主,到今日,你都仲信嗎?

要僭建政府,破壞公務員體制,最有力的方法,就是否定英治年代體制:公務員是差的,積極不干預,小政府、大市場等等,這些著眼於限制政府權力都是錯的,一腳踢這些傳統全部踢開,梁特就可以隨便「改革」了;打著「齊心」、「改革」的旗號,以「扶貧」、「幫窮人」、何喜華相信佢,話唔定下一次係泛民的立法會議員呀,對不?事實不一定會這樣發生,可是這就是梁振英的算盤!只係用口鼓吹兩下「大政府」,話唔定就會有人真心相信,為佢護航呢?

香港最荒謬的一點,就係先被港共政府不斷賴「積極不干預」、「小政府、大市場」來搞官商勾結,然而事實係,特區自董建華起,早就不搞「積極不干預」而事事干預,早就強調「強勢政府」、「強政勵治」,明明講左十五年,之但係政府倒轉頭話自己係「小政府」之時,大家又信喎;原來失憶的唔止係政府,包括我地泛民主派中人,都可以忘記政府正反都講過哂,然後他們當中部份人就得出一個結論,認為要解決目前的社會問題,就要反其道而行,即「大政府,小市場」,要更多干預云云。

事實係乜野?「積極不干預」,唔代表唔干預,公屋、居屋全部都係英治年代起的;八十年代,樓市試過幾次大跌,當年香港政府有冇長期停建居屋?當年香港政府有冇減建公屋?全部都冇,因為樓市本身就係「小政府」的一部份,即香港政府的「小政府」當中就包括了干預樓市的政策,因為樓市由土地供應、賣地等全部都係政府行為!特區政府「姓賴」,把自己官商勾結益地產商的行為,好似高官推畀老婆咁推落上手的英治年代政策度,香港部份反對派又照單全收,畀人講多幾次就信,以為「小政府」就必然唔賣地,小政府就必然唔起公屋居屋,正一人講你就信,被政府呃左都唔知!

香港的「高地價政策」,聽落好嚇人,好多人「望文生義」,以為「高地價」即賣「貴樓」,即支持瘋狂樓市,其實係誤解!英國傳統把賣地視為「間接稅」,以減少直接稅的手段,這就是為何英治年代冇消售稅,大部份貨品無關稅的主因;偏偏經過港共政府十五年來不遺餘力的扭曲,而有些人明知事實卻為配合自己的經濟政策,不去為事實澄清之下,很多年輕人把上述的概念全部搞錯了,於是一聽見「高地價」、「小政府」、「大市場」或者「積極不干預」就無名火起,從這點看,特區政府敗壞英治年代的抹黑十分成功,洗腦教育談不上大功告成,也相去不遠矣。

香港的樓價於 80 年代起有如火箭般幾乎只升不降,其源頭乃簽署中英聯合聲明時,中共要求英國每年不能賣超過五十公頃的土地,於是供不應求,樓價不斷上升。另一方面,因為經濟急劇轉型,原本很多土地預留為工業發展,最終卻因為中共以利益收買港商北上,令香港的工廠於 90 年代初期大量流失,於是資源錯配,令樓價比天高,這根本是「失敗干預」的結果--限制賣地,即使明知上年度的土地不足,今年想加都唔得,責在何方?中共是也,怎可反過來怪「小政府、大市場」和「積極不干預」?如果真的是大市場,地價高政府怎不增加土地供應?為何不能增加供應,就係中共搞出來的「豐功偉蹟」!傳媒洗腦對此長期唔提,好多人就中伏,以為係英國佬搞的,何悲也!英國管治香港一百幾十年,係得最後十年樓價只升不跌,點解?多謝中共啦!

當特區政府根本完全不足信賴之時,你畀佢政府再大,再強勢,佢地都唔會去幫弱勢,而只係不斷開位益自己人,搞官商勾結,曾蔭權加副局長加政治助理,教育搞教改搞國民教育,再倒數番去董建華時代用大量公帑去亂買硬件電腦放廁所等超級浪費又冇用的干預,根本就唔會幫到市民,只係變成官商勾結的溫床。

港共政府的政府仲唔夠大咩?梁振英話要用來推動經濟政策喎,佢有咩經濟政策呢?中港融合,增加自由行,未就係佢的經濟政策囉,好似當年的數碼港、中藥港、鮮花港、伊斯蘭金融這些「大隻講」全部都係「大政府」的「經濟政策」,而家去左邊?仲要僭建更多行政部門來「大政府」,傻的嗎?

梁振英未上任就已經打算僭建政府,五司十四局是如搞出來的?就是他的「大政府鴻圖」,如果你支持大政府,難道你要支持梁振英?在「梁朝」,請問有何支持「大政府」的空間?政府干預全部唔係顧存北京,就係搞官商勾結的權鬥,點樣支持得落?

香港一日唔民主,就根本冇搞「大政府」的條件,你冇一個民主議會的監督,大政府只會變成「老大哥」,好似中共一樣,表面上有社保基金--卻被高官挪用來貪污;表面上有最低工資最高工時,富士康卻跳完又跳自殺。


泛民主派好多真心人士,明明自己身為「在野之身」,卻忘了自己是誰,以為自己係執政黨,在野黨的角色,係監察政府,係小心質疑政府的一切圖謀,而唔係授權政府相信政府;在從政治角度去睇,撐梁振英「改革」,成功的話係幫佢連任五年,幫佢渡過僭建風暴誠信難關,幫佢累積民意話「民主冇用」,要「齊心相信梁特首」,更唔好提佢可以順手毀滅公務員傳統同體制,令香港「澳門化」,變成僭建政府直接由西環管治,梁朝的「大政府」,你敢相信?

口爆一句「大政府」,就好似過期春藥咁令到好多泛民中人心思思,以為可以達至佢地願望,也難怪張炳良、陸恭蕙、何喜華之流,前仆後繼投共,希望泛民主派緊記:

其一,民主行先,經濟左右的討論行後;
其二,就算小政府,一樣可以關懷弱勢扶貧,而且錢係直接去到市民手,唔係行政費用浪費哂;
其三,應大則大,應細則細,唔係事無大小都要大

祝香港好運!

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀