支持及訂閱請按 Like

星期三, 3月 02, 2011

六千蚊與民主

特區政府自七一以來最大的政治危機,在北京親自指點下一夜解除,先搵曾蔭權扮陳水扁,在畫面顯示示威者完全沒有和其有身體接觸之下,報警就被打心口,再宣佈退稅六千蚊,挽回中產的支持,然後每個永久居民都派六千蚊,令所有人都有錢分,立即令反政府勢力消散了一半,而泛民在這樣的形勢下,仍然完全不明白大勢失分,北京實在高招也。

為甚麼泛民會失分呢?冇錯,特區政府已經衰到加零一,如果有民主,即使派了錢聽日選舉,都保證一定倒台,但係泛民自己呢?佢地有冇搞清楚香港市民究竟係需要乜野?有冇搞清市民最需要的是甚麼?

市民今日最需要的,係解決燃眉之急,通脹與加價,民生的失敗,永遠都走在理念的前面;當年俄國大革命,口號係麵包;由八九六四到今日茉莉花革命,由零三七一到今日香港,都係由高通脹等民生問題,才會令大多數冷漠的人民走上街頭,這就是赤裸裸的人性,這就是任何地方都不能例外的定律;作為「一般人」以外者,當然不能只追求低層次的問題,但如果連低層次的問題都無法解決,有誰會相信你可以解決更高層次的問題呢?市民如何會相信你呢?

冇錯,香港有好多問題未解決,亦有好多問題唔係派錢可以解決的;但對於一個唔係由香港人選出,而且弱智、無能、無恥的特區政府,乜你仲有期望咩?我地泛民主派一方面又話沒有民主就沒有民生,另一方面佢地又真心膠地相信呢個政府,可以有為到以政策解決民生問題,這是否完全矛盾的邏輯呢?你期望邱騰華會真心為你搞環保?你期望曾德成會真心為你解決民政?你期望林瑞麟會為你解決政制?有這樣期望的人,是否病到發燒?

在這樣的敗家政府統治下,派錢唔係一個好方法,卻係沒有方法中的方法,最少係「還錢於民」,把點樣使的決定權交番畀市民;橫掂都係浪費,點解要畀班官浪費?點解唔畀市民自己使番?市民個個都會叫好,泛民主派應該有咩反應呢?事實證明佢地永遠走在民意之後,當市民爆憤怒的時候,佢地卻錯失示威遊行機會;當市民條氣順番少少的時候,佢地又嫌市民「短視」了。

特區政府的確係無能弱智以及超級乞人憎,但係泛民主派有冇諗過?我地支持你反政府,唔係支持你地更多會令情況惡化的政策?我地反對派錢畀強積金,但係強積金最初係誰有份通過的?幾日前和一些 80 後、90 後年輕人討論過「全民退休保障」,第一個反應就係:咁我地仲要供幾多?

上一代人口多,幾乎係年輕的一倍,遇著香港最光輝的歷史時刻,買到樓又有機會,而今日的年輕人卻係百無--既冇機會,亦冇樓,相對人工更低一大截,呢個時候來推廣全民退休保障?現實的問題就係,就係由我地呢一代最慘的人,去供養而家上哂岸等退休的人,看看歐、美等國的退休金搞出咁多赤字問題,請問香港在冇民主的情況下,這是否一個合適的時機?你們是否要把年輕一代,全部推到建制派那邊去?

另一個更大問題就係新移民冇錢分,有泛民議員說這是「不公平」和「歧視」;請問香港今日和三十年前有咩唔同?當年的香港係發展中,有大把機會給低技術的工人,今日的香港呢?唔通大家認同曾蔭權--香港可以住一千萬人?唔通大家認同唐英年--要同大陸進一步規劃合併?

香港人自身難保,而且政府長期以來顧全大陸,高鐵七百億係大陸人用,四川百幾億都係大陸人用,難得終於有只限香港永久居民的福利,只不過係區區三百幾億,唔公平?歧視?究竟係邊個歧視邊個呀?

更何況新移民唔止係領取綜援--唔好忘記,綜援已有雙糧,嫌唔夠可以支持綜援三糧,市民都未必會反彈,但係點解要幫全體新移民領取六千蚊?唔好忘記,新移民除左窮人之外,仲有用六百五十萬投資移民香港炒樓的果班人;請問泛民議員係唔係支持政府派錢畀佢地來香港炒樓?

呢幾年講到投票權,泛民就投訴中共「種票」--新移民絕大多數撐建制派,唔知佢地支唔支持新移民都應該立即有投票權呢?如果唔支持,點解要歧視佢地?點解咁唔公平?荒謬!無論係綜援定係六百五十萬的炒樓投資移民,只要住滿七年就有錢分,這又怎算歧視呢?

更唔好忘記,香港身份證的持有人,除了新移民之外仲有十萬計的外傭,如果非永久居民的新移民可以分錢,咁同樣擁有香港身份證的外傭呢?佢地點解冇份分?佢地都一樣為香港人付出貢獻,更肯定有為香港的經濟努力返工添?唔通因為佢地係菲律賓藉、印尼藉、泰藉,我地就要種族歧視佢地,令佢地唔可以分享中國藉人士的福利嗎?用十八歲、永久居民作為標準,就係連司法覆核都好難推翻的標準,反而用佢地建議的方式,只會帶來訴訟,市民有排都冇錢救急。

事有輕重緩急之別,民氣有可用與不可用之時,我地當然應該繼續爭取民生與民主,但係是其是,非其非,政府肯還錢於民,最少值得慶祝一次市民的勝利--雖然呢個勝利只係微不足道,早就應該有的勝利。

誤判市民的期望,意圖把市民騎劫到自己的議題,這就必然失分,偏偏泛民就係有咁多真心膠,佢地對民情的掌握,真係仲衰過特膠政府...唉...

泛民當務之急,係在街頭反擊民建聯的成功爭取攻勢,大大隻字回應啦:
「六千蚊係市民自己反對得來,而唔係民建聯乞番來的」
這個小工具發生錯誤

熱門文章

這個小工具發生錯誤

最新文章

  • 當左膠變成熱狗 - 驚見「左膠御用」傳媒獨立媒體《當蔡子強變成林忌》一文,左膠不但沒有從脫離群眾,被大量原本的支持者離棄,以至被原本的同路人所質疑,以至高呼要票債票償吸取任何教訓,更反過來四圍挑起火頭,繼續人身攻擊,特別是這位當年亂寫「歧視」等法律,當年不斷亂屈「歧視法西斯」的左膠作者「稻草」。 當左膠連溫文保守如蔡子強,也要點名...
    6 個月前

最近文章

再次伸延閱讀