支持及訂閱請按 Like

星期日, 11月 07, 2010

大家樂與太刻薄

一場荒謬的明加實減人工鬧劇,以一個更奇怪的全面投降告終,蘋果:『聲稱為配合最低工資立法,而將員工用膳時間剔除工時的大家樂集團,在全港罷食壓力下終於「跪低」,昨日宣佈撤回扣飯鐘錢的安排,員工已獲得的加薪則繼續保留。』

在評這場既荒謬又奇怪的事之前,先聽聽飲食界的功能組別議員張宇人講乜?

張宇人:「大家樂事件反映最低工資問題非常政治化

好好笑呀!最低工資立法本身就是最政治的政治問題,一個政治問題不政治化,難道要娛樂化?雖然飲食界」係一個唔民主的功能組別議席,張宇人的 IQ 唔係低到連一個政治議題當然政治化都唔知道嘛?唔怪得咁怕普選啦,唔係連最低工資係一個政治議題都唔識嘛?下次張宇人出來會唔會同大家講:「阿媽事件反映阿媽係女人而且非常阿媽化?

和唔知食過幾多次又話罷食的田北辰不同,以前我真係成日食大家樂,想當年大家樂率先以流水式作業減省人手,有質素訓練令員工服務質素高,唔使成日睇茶餐廳伙記面色;快餐都有一定質素,更有款式創新,大家樂的成功,曾經係香港成功故事的一部份,亦係一個一直深受大家喜愛的商標牌子;大家樂作為一間連鎖式快餐店,持平地說其管理仍佳,在對員工的待遇方面,比起很多食肆都要好,就算真係引入最低工資 $28,對好多公司的影響都遠大過佢地,陳光俗絕對係枉作小人與自毀長城;今次「明加實減」人工,即使唔需要面對罷食,結果都係把多年經營的商譽毀於一旦,賠了夫人又折兵,絕對係政治弱智的代表作。

其一,就係香港社會的所謂「仇富」現象,其實係「仇官商勾結」;的確社會怨氣眼紅等等都係事實,但為何大家樂當災而唔係其他待遇更差的食肆呢?原因就係陳裕光身兼最低工資委員會的公職。特衰政府本身就係一個堆積了十幾年民憤的火藥庫,而陳裕光攬住呢 D 火藥都唔知,仲要火上加油「明加實減」,冇病嘛?你地真係當市民係唔識反抗的嗎?你地真係當香港係大陸,可以畀你班大商家官商勾結惡哂?商家要忠於自己,就唔該遠離政治權力,以為可以透過建制去出千,結果就連老本都賠埋。

其二,就係市民真係好好彩,遇著第一個幾近政治白痴的大家樂,如果今次唔係「明加實減」,而係「加減相抵」,甚至係「加少少」人工,故事的結果就會好唔同;首先唔會有罷食,亦唔會有工人出來抗議,佢地更可以大條道理說:「我地只係調整計薪的方式」,而唔會遇到反抗,而結果就係午飯時間必定唔計鐘,而唔會再有人討論食飯時間必定要計落人工當中。

在此之前,林忌苦口婆心不斷強調,商家有無數對抗最低工資的絕招,仲有好多人當係耳邊風,仲有好多人話係林忌太有創意,事實證明就係由議員到工會,從來都冇認真諗過任何堵塞漏洞的方法,加了最低工資,減去了你現有的工時,好彩就可以早放工,唔好彩好似前排傳過的九巴咁,返幾個鐘,放幾個鐘,再返幾個鐘,到時打工仔就嘈都冇得嘈。

其三,就係今日的香港係一個死局;做老闆果班的心態,今次大家應該見得到,佢地對個社會完全脫節,甚至搵埋政治顧問公司,都仲係用番上世紀的滅火思維了事,以為這樣可以滿足市民大眾的要求--市民不滿的,係對整個制度的不滿,係對沒有話事權,任由「阿爺」、「上頭」任意玩弄控制的不滿,在沒有民主制度的競爭下,所有民生議題都隨時爆炸,你唔從根本去解決問題,結果就係隨時隨地都會爆發問題。

其四,低落的企業文化冇人敢提及;回歸後的特區香港每況愈下,比起日本甚至台灣,員工往往由上至下敬業樂業的態度,距離越來越遠。香港全面大陸化,老闆無知又自以為是,在一堆尸位素餐的高層包圍下集體腐化,腐敗無能的管理作風,把私營公司都搞到好似污煙瘴氣的共產國營企業,賞罰不公、拉幫結派、皇親國戚等,搞到真正有才華又有能力的,因為「懷才其罪」而被排擠,專用廢人的結果令到公司生產力低下,而低下的生產力又令到呢班老闆寧可以刻薄價請人,都唔願付出合理價錢去人盡其用。

中國人的作風就係,表面勤力第一,生產力第二;和工作時間短,但生產力驚人的法國人唔同,香港的員工經常要加班工作,浪費了員工的私生活時間,卻提高不了產能,結果令人工不斷拖低,或者被高薪而垃圾的管理層浪費了(望望政府就知了),結果就係雙輸--職員浪費生命,公司浪費資源,雙方都係玩 game theory,由鬥蛇王和賤低薪對決。

其五,香港的密集平價勞力經營模式,在引進最低工資之後必定會改變,當機器平過人,老闆都會用機器而唔用人(隧道公司以快易通來屈每月三十五蚊行政費另計)。一大堆低學歷、大年紀特別是新移民,將會因此被洶汰。

不改制是死,改制也是死,今日香港就好似社民連內鬥咁,唔係 slow burn 就係革命,最終永遠都是開出雙輸的結果......
這個小工具發生錯誤

熱門文章

這個小工具發生錯誤

最新文章

  • 本土派的六條命題 - 經《本土研究社》的陳劍青推介,讀到今日維基百科關於「本土派」的條目,真係唔識就嚇一跳,識就得啖笑,成個條目連最基本的還原歷史事實都不會,似足中共版本的「抗戰史」,把國民黨一筆刪去般,把所有非「熱普城」的本土歷史全面刪去。 這種所謂的「本土派」,又和他們口中的「中國人」有咩分別呢?其人格是否可以更為低劣一些?「本...
    5 個月前

最近文章

再次伸延閱讀