支持及訂閱請按 Like

星期一, 10月 18, 2010

官商勾結 3.0 之「錢來自德成」

毛孟靜今日在信報的文章《施政報告的魔鬼》,提及「官商合作」的100億元「關愛基金」:『這個基金講扶貧,即是慈善,捐錢自然有得扣稅。但100億元當中,有50億元本身就來自政府的稅收,餘下的50億元,表面上是商家「捐獻」了很多,都是社會上發財立品的善長仁翁,可是扣了稅後,商家是否只是把原本用作交稅的一部分錢,改為以「捐獻」名義送交政府?兩者相減之後,究竟商家真正捐獻的有幾多?
...
原本這筆錢是政府堂堂正正的稅收,交稅是一項義務,可是經過財技的一輪粉飾,改名為「關愛基金」之後,這筆錢就變成了商界的額外捐獻了。把常規、有正常程序處理的稅收,改為幫助商家改善形象,同時造就花錢賣廣告「都未必有咁好」的媒體宣傳,這果然是一項「官商合作勾結」的偉大德政,特區政府為紓緩「仇富」情緒,為了商界的形象努力,實在是用心良苦。』

官商勾結 1.0
老老實實呢條橋真係好得,先把稅收改作可扣稅用的慈善用途,再加上原本已經交左稅的五十億政府錢,一夜間全部變哂做特區政府為商界洗底,賣免費廣告的錢;原本政府應該做的事,以後就大條道理:「拿拿拿,李家已經關懷左你,香港係自由市場,既然商界已經關懷你,政府就應
該退出福利市場,等佢地關懷你就夠啦,唔使政府做啦」。 

看到呢度,你開始意識到問題,對唔住你太太太太善良啦;你以為上述的問題,係事實的全部?以上的答案實在太簡單,你諗得明證明你有多少經濟學底,只係有資格做「官商勾結 1.0」;各位讀者,睇野啦!

官商勾結 2.0
去到呢一刻,好多同林忌一樣善良的人,都仲未意識到係發生咩事--畀錢,梗係好啦;派錢畀你,有邊個會拒絕呀,大家留意啦,傳說中下屆的特首唐英年有野講:『唐英年昨日撰文,指發揮「及時雨」作用的「關愛基金」,援助項目不拘一格,項目可以包括特殊藥物、食物援助、家居安老、青少年學習和拓闊視野等』

明唔明呀?你以為商界果五十億援助,一定係錢?呵呵,既然商界做生意,點解一定要捐錢,而唔可以捐服務、捐實物先?你地太、太、太老實啦,林忌只係用多左幾秒,就已經想像到個畫面:試想一下,牛頭角的順嫂原本返工好辛勞,賺埋果少少都係畀李家賺番,然後佢賺你一千,送番一百畀你,然後日日都影住「李家關懷你」、「李家呵護你」、「李家愛惜你」關愛津貼,由內衣津貼,關懷到送埋「李家商界關懷福佳洗底褲津貼」,免費送你一百張福佳洗底褲券,順嫂又豈不感激流涕,不知所言?既然有福佳超市,你地窮嘛?倉底有咩貨送畀你,咁未一商家便宜,兩商家得著,官商合作一番囉,明冇?由政府出錢,向商家買倉底貨,然後把倉底貨,唔等使的垃圾,或者已經跌價跌到暈的垃圾,全部用原價--即係電視遊戲節目成日自稱唔知幾多萬,唔知幾多十萬,完全唔等使的垃圾呢,全部用原價送畀「有需要的你」,然後跟原價開數,再把呢 D 倉底貨的原價,或者作大價,計作慈善用途的扣稅!絕呀,送得愈多,商家賺得愈多,林忌真係好佩服諗出呢條福佳絕橋的人,呢個咩「官商合作關愛基金」,真係超越哂以往的官商勾結慣例啦!

官商勾結 3.0
你以為官商合作勾結的故事,去到呢一刻就結束?你未免低估左香港商界的能力嘛?留意啦,特區政府今次這個「關愛基金」,唔係由傳統負責社會福利的勞工及福利局負責,而係交由「我來自德成」的民政事務局去分配!點解要由民政事務局去分配呢?究竟曾德成「何德何成」,可以取代傳統的福利局去做野呢?以往民政事務只係地區的咨詢機構,專負責 D 街坊小事,點會突然「升呢」,幾百億幾百億咁倒落去由佢地負責呢?究竟特區政府咁做,有咩目的?

記得唐英年講過乜嘛?「青少年學習和拓闊視野等」都算「關愛基金」的一部份呀!咩叫青少年學習呢?咩叫拓闊視野呢?記得特首施政報告仲講過乜嘛?冇錯啦,就係「德育及國民教育科」,以及資助中、小學生最少一次北上去大陸交流啦;有去過、聽過、感受過呢 D 大陸交流團的朋友,當然明白呢 D 節目其實係咩一回事--點解要搞呢?就係有些人借愛國愛港為名,行上下其手之實;表面上,國家資助呢樣,資助果樣,令到好多香港的青少年呀、學生呀,可以「受惠」,平價去大陸玩,實際上呢?去邊度玩?去邊度交流?去邊度食飯?去邊度遊覽?全部都係一盤大生意;香港人平價北上,點解可以做得到呢?

因為有人補貼;咁邊個補貼呢?原本係國家的、親中的、愛國愛港的機構,補貼你的費用,然後就去另一些特別關係良好的、親中的、愛國愛港商人的生意度消費,以國家的錢,去補貼愛國商人的生意;後來國家發現,咁樣使錢都使得好快喎,國家雖然好富強,但係都唔係話想使就有得使喎!所以,曾特首今次最偉大的發明,就係利用「關愛基金」的名義,交畀「愛國愛港」的曾德成局長,去負責、審批呢一百億點用!究竟係用來資助去某城鎮旅行,定係資助去大陸某鄉村參觀呢?有了這合法的一百億「關愛基金」,唐英年政務司司長,以及曾德成局長就可以大開中門,同全國各地的鄉鎮呀、幹部呀、以及商家一齊研究如何加強「官商合作」!互相關愛一番!

亞運五百億,係錢來自德成--民政事務局負責;一百億關愛基金,都係錢來自德成,都係交由民政事務局負責;原本公民教育由民政事務局負責,將來「公民教育」變成了「德育及國民教育」,呢一筆新的錢當然都係「我來自德成」啦!共產黨真係好想講:「德成顧傭,深得我心」,用呢筆錢同親民建聯的商家「官商合作」,用來收買愛國愛港新移民,資助佢地的地區活動;用呢筆錢來「官商政黨一家親」,把某些政黨收買選票的活動,全部收編入去呢個官商勾結 3.0 的體制之內,絕橋呀!由市民到傳媒評論,到今日都仲係傻更更,哈哈哈哈哈!!!!!!
這個小工具發生錯誤

熱門文章

這個小工具發生錯誤

最新文章

  • 本土派的六條命題 - 經《本土研究社》的陳劍青推介,讀到今日維基百科關於「本土派」的條目,真係唔識就嚇一跳,識就得啖笑,成個條目連最基本的還原歷史事實都不會,似足中共版本的「抗戰史」,把國民黨一筆刪去般,把所有非「熱普城」的本土歷史全面刪去。 這種所謂的「本土派」,又和他們口中的「中國人」有咩分別呢?其人格是否可以更為低劣一些?「本...
    4 個月前

最近文章

再次伸延閱讀