支持及訂閱請按 Like

星期六, 8月 14, 2010

要搭巴士真陰功

要搭巴士真係好陰功o架!

次次死十幾廿人的意外,有邊次唔係巴士?由於巴士冇安全帶,一旦出現衝落山(如屯門公路),或者同其他大車相撞,巴士乘客真係超陰功,特別係連坐都冇得坐,要企果隻;一旦出意外撞車,拋跌拋離坐位,死傷率一定好高。

然而巴士都總算有大把位,除繁忙時間之外,往往好多時都有空位,最少好過「坐港鐵」--幾乎多數人坐都冇得坐,全情罰企罰走的港鐵。

不過更陰功的係,我們社會的政策,不斷側重有權、有名、有利的人,令香港不但是全球貧富最懸殊的城市,而且是窮人最含忍的地方,連有架爛七人車,都可以以為自己是皇帝一樣,出來攻擊坐巴士的市民;這種「階級觀念」,是如何出現的?

就是香港人默許的「有錢大哂哲學」--畀得起隧道費,就可以行西隧快些,畀唔起你塞舊隧啦!鬼叫你窮呀,塞車係梗o架啦,政府唔會理之餘,連市民都要恥笑埋你。

好多無恥政黨仲呼籲要「電子道路收費」,用錢去趕絕其他人去中環的權利,你冇錢呀?你搭巴士去中環啦!鬼叫你窮呀,去中環要畀錢o架,知唔知道呀窮人?

政府不是靠改進公共交通工具服務,去鼓勵市民乘搭,而是單靠「貴」,來阻嚇市民不要開車--結果呢?就是有錢人大哂,窮人你地慢慢迫啦!要同人迫呀?真係冇陰功囉,知唔知人地環署局局長邱騰華,日日坐住架有司機接載的 3.2L 福士輝騰同你用口講環保呀?鬼叫你窮呀,冇錢冇權坐私家車!更冇權坐有司機等待,隨意浪費地球資源的專人接送車。

仲有呀,鬼叫你窮要做司機呀?冇錢你冇權嘆冷氣,停車一定要熄匙,你五十度晒死係你窮的錯,明唔明呀?鬼叫你生出來阿爸唔係李嘉誠,唔係有錢人,而係窮鬼?你窮鬼,就要捱一世,明唔明呀?

阿婆你窮呀?記得帶環保袋出街啦喎;你老人癡呆得來仲要窮?咁就唔好去超市購物啦,留番 D 錢買元寶蠟燭啦!冇錢交五毫子膠袋稅?上網去撐政府賺五毛來換膠袋啦,知唔知道呀?

外國雖然很重稅,但普羅大眾的權利絕大部份都一模一樣--大家有樓住,有車揸,有書讀,有婚結,有民主選票,有空閒自由,然而在香港,就以每屆會考的十萬個年青人為例,其中只有三萬三千人有得讀預科,兩年後只有一萬二千人可以升讀大學,而當中最多只有幾千個「專業學科」大學畢業的年青人,擁有可以追求理想生活的將來--即 2%-5% 的適齡年青人。

外國失業率的確高企,年青人往往有兩三成失業率;但失去尊嚴的佢地,都仲有政府養,都唔使瞓街,都仲可以懶懶閒過日晨;然而在香港,超過七成的年青人卻只為了最基本的生活需要,為了最迫切的生活權利奮鬥,而失敗者不但沒有保障,仲要被認為是「冇用」、「懶」、以及「垃圾」。

政府每年花了五百幾億於教育,每年卻只能令 2%-5% 的年青人變得「有用」,究竟是誰的錯?是香港人的人種特低,還是香港的制度本身係最垃圾?

鬼叫你生遲幾十年呀?鬼叫你投錯胎呀?如果你生早幾十年,好似上一代人咁,五至十年就供完一層樓啦!供幾年賣出去就夠賺多佢地一生人搵幾倍的錢啦!而家佢地發哂達,你班後生仔未活該做佢地的奴隸囉,冇錢維持呢個制度,就係你地後生仔無能的錯!明唔明呀?

即使好似某 D 人會考零分,再考都係得一分,只要你有個「有錢阿爸」,你就係大爺!鬼叫你 24 歲時冇幾十萬買車呀?鬼叫你阿爸阿媽窮呀?鬼叫你冇個有錢佬養大你,畀錢你揸七人車去巴士站示威,而要搭巴士呀窮人?真冇陰功,鬼叫你生在香港呀?

生在大陸,過兩年都可以「開車自由行」,開住架噴黑煙用大陸油的私家車,來香港打橫行!你生在香港?搭巴士啦你!鬼叫你生在中共的次殖民地香港呀?香港人,你係奴隸咋,知唔知呀?



熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀