支持及訂閱請按 Like

星期一, 3月 01, 2010

紅隧塞車之真心難求

這個世界很奇怪,很多人有料唔會成日晒,但更多人係冇料充有料,最鍾意就胡亂發音--家下唔係事必要你講,但係你唔識卻亂UP 當秘笈,就累人累物誤盡蒼生,辜負天下人。

對,近日「消息人士透露」,政府那個甚麼三條隧道分流聘請的咩專家建議,就係調高紅隧的貨車收費云云,聽完好多人都好憤怒,因為這個近乎弱智式的「加價」建議,真係除左講一聲呃錢之外一無是處--加價又使唔使搵「專家報告」來建議呢?

近日見到高登有一個「真心難求」的討論,一個疑似假膠的發言,卻又來一班既對塞車冇認識,卻又唔願做功課亂發音的人士,最好就是用來作為反面教材,讓大家理解一下,點解香港有幾多無8聊人,好鍾意識扮扮冇代表的代表作,現引如下:

高登用戶「朱茵莫望報」:[男人三十好失敗] 紅隧好多私家車都係得一個人
內文:「平日返工放工塞成點, 我諗唔駛我點講都知;星期六日亦都塞到爆;望出去, 好多私家車都係得司機自己一個人;塞哂成條紅隧;其實好多人好多車都唔係過海, 只係個樽頸位;咁就一齊塞

唔係話有車唔渣, 走去迫巴士;但既然三十歲咁成功, 為咩慳o個幾十蚊, 唔行東西隧呢??

在一堆甚麼「養車」、「改用電單車」、「三十歲成功問題」之後,我們見到一位高級會員「到此一遊」,提出超智能的建議:「大幅增加私家車隧道費 巴士免隧道費 (大前題要同時減票價)」

嘩,好似好合理呀!拿,巴士隧道費減,一定令更多巴士行舊隧啦!咁平左隧道費,巴士公司慳左錢,就梗係應該減票價啦!

簡直係完美的邏輯思維方式呀!經常被小明、五毛評為「冇料到」、「不學無術」、「窮人」等等的林忌,絕對係因為自私自利開私家車,所以唔提出呢個建議啦!到此一遊的建議,絕對係驚天地,泣鬼神!絕橋呀!

只不過,雖然世事都佢看透了,但有些基本常識,卻是「發音」的基本關鍵--例如建議北極企鵝觀光團係好,如果搞得成一定發大達,不過最基本的問題,卻係北極有冇企鵝囉,係唔係?

其實有時要避免硬膠,最簡單就係發音前做少少功課--例如查查紅隧的巴士收費,就可以膠少次,而唔會失禮囉--各位網友,大家可知道舊隧的巴士收費係幾多錢呢?

# 公共及私家單層巴士:HK$10
# 公共及私家雙層巴士:HK$15


冇錯,一架單層巴士只收 $10,一架雙層巴士只收 $15,咁唔知如果免收佢地隧道費,你估巴士公司可以減幾多錢畀你呢?

就當一架巴士平均只得 75 個客好唔好?每程減兩毫子畀你囉,如果繁忙時間坐滿,減番一毫子畀你囉?你覺得呢一、兩毫子對你的人生,係唔係好重要呢?

我知有人想大鬧:林忌你 d 唔知人間疾苦的人渣,一毛呀!你估一、兩毫子唔係錢呀?你知唔知一毫子對你可能隨時跌左去,但好多人係辛辛苦苦靠上討論區鬧你,打幾廿隻字先賺番來o架?近牌五毛黨跌價,得番一毫子一個 post,鬧你兩次先得果兩毫子,一日坐兩程巴士計,總共要鬧你四個 post 先賺到四毫呀!

對對對,就當巴士公司會好有義氣咁減番果兩至四毫畀你,知唔知道結果會係點呢?我地這些偉大的環保朋友,佢地以為多人坐的車,就係環保的車,因此以為多 D 巴士行紅隧,就係環保,情形就同建議免巴士收費行紅隧一樣,簡直就係環保大使呀!

很悲哀的,現實和這些偉大的智能不相乎--各位有行紅隧的司機,大家來見個證--可知道由於紅隧的巴士收費特低,全香港絕大部份的巴士--包括旅遊巴、私家小巴、村巴、大陸旅遊巴,無論係有客,或者冇客,或者係純粹調配,佢地都會照行紅隧,而唔會行東隧西隧?可知道繁忙時間有幾多架空車旅遊巴,不停穿梭紅隧?可知道紅隧港島入口的垃圾設計,令大量港島南區出九龍的大型車輛,在隧道口不停由最右線切去最左線入隧道?令紅隧港島入口,永遠比起九龍入口更塞車得多?

對,這些用自己幻想發音的網友,佢地係唔會做實地研究的;不過就算唔做實地研究,只要上網查一查東西隧的巴士收費,就可以一目了然明白,點解大量的大陸旅遊車,都寧願在繁忙時間塞爆你的舊隧,而唔肯行東西隧!

東隧收費:
# 7.公共及私家單層巴士:HK$50
# 8.公共及私家雙層巴士:HK$75

西隧收費:
#7 公共及私家單層巴士 法定 HK$120 實收 HK$80
#8 公共及私家雙層巴士 法定 HK$175 實收 HK$115


答容好簡單,單層巴士的三隧收費分別係 10 : 50 : 80;雙層巴士的收費分別係 15: 75 :115

點解旅遊車司機寧可行舊隧,明了嗎?如果你開始明,恭喜你,你明左事實的四分一!價錢舊隧平太多了!

咁另外的四分三呢?乜仲有其他原因的嗎?當然有,係囉,點解旅遊巴司機咁弱智,改一改高登用戶「朱茵莫望報」的問題: 「紅隧好多旅途巴都係得一個人,點解佢地咁傻仔呢?唔怕繁忙時間塞車嗎?」

哈哈哈哈哈,第二個原因?就係有巴士專線!

冇理由o架,大陸旅途巴都可以行巴士專線o架咩?乜巴士專線唔係只限我地新巴九巴城巴o架咩?

對唔住,根據運輸署的講法,隧道口的巴士專線,係咩巴都可以行!簡單而言,大陸旅途巴即使只係一個人開,都老奉行巴士專線打尖o架!根據路面觀察,繁忙時間可以連續來十幾架巴士(過半係空車),老奉由巴士專線打尖入隧道,一些又噴黑煙又入大陸油又老又殘的巴士,因為極度遲鈍,都仲可以施施然由我地的巴士專線打尖入紅隧,再慢慢老爺行車「慳油」!哈哈哈哈哈,而家咁多大陸遊客來香港,當我地香港人個個為左返工,先被迫塞車塞都阿媽都唔認得的時候,原來霸佔我地隧道空位的,唔係呢班人「幻想中」的私家車,而係呢 d 旅遊巴,偏偏仲有偉人唔單止唔去解決呢個問題,仲走去建議--巴士免隧道費!

冇錯,為左慳「兩毫」(如果滿車,就得番一毫),我地要為左呢d 人的愚蠢,再付出幾大代價呢?不如舊隧畀哂大陸人行好唔好?

第三個原因,就係私家唔係傻的,傻的係網上的真心膠--好多車寧願行番紅隧而唔係東西隧,除了錢,更大的原因就係時間!

咩話?紅隧咁塞車,都塞紅隧慳時間?你講野呀?

這個世界最奇怪的,就係當見到眼前的事實--司機用腳投票的時候,我地偉大的「第三者」,唔係深入研究對方為何要這樣做,反而卻一口咬定對方係傻佬!巧威威呀!全世界都係傻仔呀!你睇佢幾白癡?為左慳雞碎咁多的隧道費塞車呀!好心呢 d 又要威,又要戴頭盔的私家車車主,全部唔好開車啦!

果少少錢,唔識行東西隧的嗎?哈哈哈哈哈,點解人地寧可塞舊隧呢?原因就係想行東西隧,都行唔到--中環塞車,灣仔銅鑼灣塞車,北角都塞車,咁點行呢?飛過去呀?

九龍果邊一樣塞到飛起--旺角塞車,太子道西、太子道東都塞車,龍翔道都塞車,油麻地、佐敦都塞車,度度都咁塞,你行得愈遠,就愈到更多塞車位,結果?最快都係舊隧塞過去!

當事實就係位於最中心,最需要多條行車線的舊隧,偏偏就係冇擴闊,車來車去,出發地同目的地都係港島中央地帶,結果中間一塞,兩邊都一定照塞,塞車時你又點樣由東開去西,又點樣由西開去東呢?

仲有,我地的偉大政府在接改東西隧的道路,當然係差到冇朋友,因此想去都去唔到!

大家大大聲話分流,口口聲聲話行遠 D 講就易,事實就係好多地方做唔到,你就算畀多一大筆錢,行遠一倍車程,結果可能都係得個吉,完全慳唔到時間!

有些真心膠以為,加貴紅隧就可以達到目標--哈哈哈哈哈,今日東隧已經飽和,繁忙時間例塞車,如果本來經紅隧的車,再全部行遠 D 去東西隧的話,保證維港兩岸的交通仲差過今日!因為大家都行遠左,將會有更多的分流匯流,行的距離更長,未又係往往要經過中心地帶--港島的銅鑼灣同灣仔,以及油尖旺一帶,結果就好似紅隧口的大車 cut 線,愈 cut 愈塞!

舉例說,港島五成人口居住的東區,日常如果要開車去薄扶林的香港大學,有 99.99% 的機會,慢過開車去位於大埔的中文大學。

這些現實的經驗,當然不會被那些又不做功課,又不實地考察,只會看圖作文的弱智官僚及懶惰記者所理解;當弱智官僚和記者口口聲聲要「三隧分流」時,那些讀完弱能報紙的網友,就拾人齒慧,琅琅上口當係自己的哥倫布新發現,只要畀佢地機會,就會忍唔住出來發音炫耀一番!巧威威呀,其他人真係自私!其他人真係弱智!

至於第四個原因就更簡單了--立即可以區分這些人是用口開車,還是用手開車的!用手開車的司機,當會計算到一升油成十四個幾,塞一塞,就立即燒左去啦!又點會走去為左慳十蚊八蚊隧道費,要走去塞車呢?那些真係要慳錢的司機,更加會經常計住自己的油錢,又點會唔知道寧可畀貴 d 隧道費,莫要塞車燒油更浪費呢?

最唔計較燒油的司機是誰呢?當然就是柴油車和石油氣的司機了!特別是大陸的旅遊巴,大陸柴油更平,燒得更抵,塞未由佢塞下囉,塞得再多都係毒死你班香港人之嘛,關佢地咩事呢?

最後一點,就係不妨研究一下 1988 年至 1993 年地鐵以失敗告終的繁忙時間附加費,就可以發現加價,永遠只可以有好短暫的作用,最終根本唔會減少客流量。(連倫敦的電子道路收費,都一樣係咁死款)

連會考的經濟學,都已經教咩叫 inelastic demand--沒有彈性的需求,你加幾多減幾多,到頭來都係一樣會塞番,但偏偏永遠有一大堆唔識經濟的人士,卻以為可以人定勝天,懶到以為乜都唔做,單靠加減價,就可以改變其他人的習慣!(都仲要未計,你加完價,西隧東隧立即跟進的結果)

再比較一下柏林、巴黎、倫敦的塞車情況,大家都係百年古都的大城市,偏偏搞收費的倫敦,就係搞得最差果個,仲要係差好多!以收費調節擠塞,保證死得更快更徹底,這點下次再寫!

伸延閱讀:
鄭汝樺成功爭取大老山隧道加價!
鳩山由紀夫「高速無料化」對香港的衝擊
左軑車來港的一團混帳
回覆邱誠武的弱智言論
和諧港台預設立場建高鐵
邱誠武與石丹理的寬頻之戰
來港產子一條龍救護車服務?
灣仔爆水管塞車全因政府弱能
講經濟效益?拆走金紫荊 (二)
解決塞車?搬走金紫荊!(一)
解決塞車之搬走工展會
三條海隧早已飽和
塞車官商勾結證據
逆市加價潮
福佳有理:建第四條海隧──比普選更難?
腦殘政府系列:強推通脹紅隧加價
西隧又加價
東隧專營權
港珠澳大橋較新海隧重要?
私有隧道建設的錯誤
馬桶令排泄增加
改善塞車之事實勝於雄辯
立即興建第四條海隧聯署
這個小工具發生錯誤

熱門文章

這個小工具發生錯誤

最新文章

  • 本土派的六條命題 - 經《本土研究社》的陳劍青推介,讀到今日維基百科關於「本土派」的條目,真係唔識就嚇一跳,識就得啖笑,成個條目連最基本的還原歷史事實都不會,似足中共版本的「抗戰史」,把國民黨一筆刪去般,把所有非「熱普城」的本土歷史全面刪去。 這種所謂的「本土派」,又和他們口中的「中國人」有咩分別呢?其人格是否可以更為低劣一些?「本...
    5 個月前

最近文章

再次伸延閱讀