支持及訂閱請按 Like

星期三, 2月 24, 2010

財政預算正能量!

1. 政府的財政預算案,最令人大跌眼鏡的就是冇加煙草稅,然而望望政府的收得密密實實唔敢見人的數據,就可以明白點解。

一年前增加 50% 煙草稅,特區政府最愛自吹自擂,最經典的金句就係「當局相信,今次大加煙稅可令逾10萬人戒煙」--呢條煙數點先?政府點解好似變左一隻死狗,又唔敢公布成功爭取幾多煙民戒煙,又唔敢公布令煙民減少左吸幾多 % 的煙呢?

利益申報,林忌呢世仔未吸過一枝煙,亦好憎二手煙,可是我尊重他人的自由權利,最討厭的就是政府打著「為市民好」的招牌,然後走去篤數吹水搞大躍進的三面紅旗工程!既然一年前政府自己在傳媒係咁吹水,話相信可以令逾10萬人戒煙,一年後的今日林忌就要同你「追煙數」,請問政府是否達到自己的目標呢?

政府唔敢答,我地再望望庫房收入,又有開心大發現!
08-09 年度的實際煙草稅收入 29.628 億
09-10 年度的預算煙草稅收入 38.216 億 (一年前的預估)

實際呢?政府厚顏無恥地寫上呢句:「在分目0 5 0 煙草項下的收入減少 7 2 1 , 5 5 8 , 0 0 0 元(1 8 . 9 %) ,主要因為煙草消耗量的減幅較預期為高。」

少收 7.216 億,實收只得 31 億的煙草稅,政府仲要大大隻字寫,話少左 18.9% 的煙草稅收入,係因為「煙草消耗量的減幅較預期為高」!

大家諗清楚,一年前預算案,話加煙草稅 50% 之後,預算收入係 38 億,同時政府又話預算有十萬煙民戒煙!事實稅收比預期更少,用政府的加減數計算方法,只會得出一個結論,就係戒煙的煙民比起預期為多!即係最少十幾萬人成功戒煙啦!

咁點解我地咁鍾意報喜的政府,居然冇大張旗鼓,熱烈慶祝煙民大減呢?點解我地的政府居然冇宣佈,成功爭取少左幾十巴仙的煙民呢?咁大喜訊居然唔全力宣傳?我地政府真係「官不聊生」呀!

作為市民的你,你有冇感受到呢一年少左一半人,或者最少兩三成人吸煙呢?作為市民的你,有冇感受到煙民吸煙少左三成至一半呢?

指加稅無助戒煙 煙商促凍結煙稅
『雖然「完稅煙」的銷量去年下跌約兩至三成,但該會成員、菲利普莫里斯亞洲集團有公司公共事務經理趙潔芬指出,公司自2003年起委託AC Nielsen每年調查兩次,並於加煙稅後,先後4次於全港18區蒐集1500個被棄置的萬寶路煙包,發現平均9.1%屬「假萬寶路」,創調查以來的新高,未加煙稅前的2008年僅為3.2%。

章健華表示,未完稅煙包括走私煙、免稅煙等的市場佔有率,由2008年的38.2%增至去年的49.9%。全港報販大聯盟主席廖社青坦言,自煙稅增加後,不感到熟客戒煙或減少吸煙,「他們向我說,袋內的私煙更平,問我有無」。』

以上數據只係計算「路邊增加」的私煙,如果從預算案的數字睇,實際上的私煙比率只會更多!

一年前我們預言加 50% 煙草稅只會益哂賣私煙的「罪犯」,結果正正就係咁!同樣係一年前,有幾多人大大隻字寫明,話海關一定會嚴加打擊走私煙,私煙只會減少唔會增加,可是事實再一次證明,經濟學戰勝中國膠,人性戰勝硬膠,那些乜都諗住「強制乜乜」、「強制物物」的人士,唔該打開你對眼望清楚--事實證明,你地果套係錯的,已經錯了一次、兩次、三次,你地要撞幾多次牆,先明白到經濟學同物理學原則一樣,係只可以遵守,而唔可以「人定勝天」的呢?

幾十年前文革期間,中國有好多真心膠相信毛澤東果套,以為人定可以勝天,於是有颱風唔係避開,而係幾千人在沙灘組成人牆,打算以人力對抗天力,結果絕大部份都死哂;去到幾十年後的今日,中國人邏輯的弱智仍然好似當年一樣的冥頑不靈,繼續以為加加減減一些數字,而唔係有一套完整的真功夫,就可以達到人地心中的目標!

呢班人口口聲聲就話「認真研究」,口口聲聲就話「做人要勤力」,可是卻懶到乜都唔做,成日諗住「加價」、「收錢」呢 d 半分努力都唔需要付出的垃圾政策,就可以收到效用;想令人戒煙就只諗住加價,想疏導交通就諗住加價,想叫人環保又諗住加稅,呢班人根本就係「大食懶」--你份工咁易做呀?只係靠加價就做得到,點解要請你做呀?

呢班懶人唔單止對自己無能與懶惰沒有半點檢討,反而仲去怪責現實唔似玩 SimCity--點解我加價無效呢?他們的弱智方法撞了牆,佢地唔單止唔會檢討自己係弱智,唔會檢討係自己弱能的錯,反而仲大鬧全世界,話係其他人「自私」!每次聽到呢 d 弱能的說話,林忌真係好想爆粗--妖!你弱智o架?乜你唔知「自私」係人類的天性來o架?人類如果唔自私,就唔使你做啦,點解要畀錢請你返來做野呀?你又「大公無私」地唔收錢做野得唔得?


2. 有線訪問:自稱家庭月入六萬,養育三名子女的 35 歲馬小姐說:『立法局議員..扶貧係錯的,我地應該 c-rea-te 多 d o既 "drop" (我相信佢係想講 job) 畀佢地... 我地樓換樓... 由四百萬換六百萬...再換到八百萬.. 再換千零萬的樓就唔應該要畀印花稅,唔應該「懲罰我地」』

呢個故事實簡直就係傳奇中的傳奇!一聽落去就知道一定有野係假的--舉例說,馬小姐的 35 歲係十年前的歲數,如果佢今日 45 歲,我地會容易些相信。

月入六萬供得起一千萬的樓?好多專業人士都唔止呢個收入,例如醫生律師一定清楚,月入兩萬供一百萬的樓,月入四萬供二百萬的樓,月入六萬,點供都供唔到一千萬的樓,即使你樓換樓,以佢的歲數來講都係天方夜談--唔通十年前佢廿五歲果時,反而月入更多?

35 歲就可以搵到一千萬?香港一定係遍地黃金啦!馬小姐的口音極度 "local"--既冇大陸音,亦冇回流音,連名校口音都冇,更加令人懷疑成件事係 Final Fantasy,又或者佢係地產界打手的可能性。

最令人覺得噴飯的,就係如果馬小姐真係擁有呢筆錢,仲可以放成千萬落層樓度,佢的流動資金一定好多,作為千萬富豪的佢,隨時股息都一大筆啦,又點解要介懷雞碎咁多的印花稅呢?樓價繼續向上升,加上佢的時間咁寶貴,又點會下午打上去有線電視新聞度浪費呢?

我都好想知道,究竟有咩 "drop”可以只係月入六萬,而供得起一千萬的樓,好希望馬小姐介紹一下,亦透露一下佢點樣「樓換樓」,好似唔使供咁,換到一千萬的故事!呢個題材如果拍得成,絕對可以挑戰 x x 神偷的「正能量」,減少呢個社會的怨氣!

3. 笑點 3.1:財政司司長曾俊華在立法會表示,為了保持香港的競爭力,迎接與內地經濟融合所帶來的機遇,建議撥款 5億元,注入語文基金,以進一步提升香港人兩文三語的水平。

笑點 3.2:民建聯工聯會指預算案部分措施力度不足 (HKT 14:34)


林忌覺得,政府與其撥雞碎咁多的五億出來「提升香港人兩文三語」的水平,不如先好好執執果班立法會議員呀、民建聯、工聯會呀、呢 d 愛國愛港愛政府的兩文三語水平。

政府的新聞公告經常「1999」,近年愈寫愈垃圾,不斷學埋大陸的垃圾中文,咩「加大力度」、「抓緊機遇」,敢問這是甚麼狗屎垃圾的中文?學生讀報,會學出甚麼垃圾中文出來?

「不足」就係「不足」,咩叫「力度不足」?咩叫「迎接與內地經濟融合所帶來的機遇」?用五億培養學生寫呢 D 垃圾共產中文嗎?

定係用五億來培訓多 d 五毛黨?五毫一個,可以出十億個 post;一毫子一個,嘩!可以出五十億個 post!

由 try my breast 到 too won too zero,仲有 c-rea-te o既 "drop",我地發現最需要培訓的,絕對唔係普通大眾,而係高官權貴;乜高官權貴冇錢讀書咩?乜高官權貴冇錢報 course 咩?搞咁多「私相授受」的屈水培訓班仲唔夠,仲要搵公帑去補貼佢地,幫工聯會之流開多 D 培訓班?
這個小工具發生錯誤

熱門文章

這個小工具發生錯誤

最新文章

  • 當左膠變成熱狗 - 驚見「左膠御用」傳媒獨立媒體《當蔡子強變成林忌》一文,左膠不但沒有從脫離群眾,被大量原本的支持者離棄,以至被原本的同路人所質疑,以至高呼要票債票償吸取任何教訓,更反過來四圍挑起火頭,繼續人身攻擊,特別是這位當年亂寫「歧視」等法律,當年不斷亂屈「歧視法西斯」的左膠作者「稻草」。 當左膠連溫文保守如蔡子強,也要點名...
    8 個月前

最近文章

再次伸延閱讀