支持及訂閱請按 Like

星期日, 1月 31, 2010

塌樓又如何?

塌樓又如何?終於死人啦,五十年樓之嘛,好啦,成棟倒落來啦,我地果班成日口口聲聲話叫八十後住唐樓的二代香港人,呢次係唔係又係「個別事件」呀?又係唔係應該叫 D 八十後供廿五三十年,用幾廿萬首期去買的唐樓呀?

財政司司長曾俊華,呢種唐樓係唔係就係今日年輕人應該用一世去供的樓呀?定係我地呢 D 四代香港人,原來係為左「有會所」呀?

在古代的中國,聽到有個叫人食肉的晉惠帝,已經被嘲笑為弱智低能的極限;在今日呢個荒謬的香港,原來較為正常的高官,已經係呢個水平o架啦!

香港的樓宇問題就係一個這樣的死局--新樓又貴又渣,到幾十年後都唔知有幾多要倒塌;舊樓那些再早期的,沒有監督的,香港仲係貪污天堂的,問題有幾多根本冇人知道。

而家死左人啦,政府諗住點樣做?乜都做唔到,叫人「強制驗樓」,就好似「強制驗尿」一樣,驗到有又點?驗到唔掂政府係唔係負責修先?

冇,我地的政府只係肯出六百六十九億去起高鐵,卻永遠唔會拿出相同的價錢,去解決一些香港市民民生急切需要解決的問題--例如驗樓,政府一味就把所有房屋問題,推去被政府人為扭曲的私人市場,推去沒有任何有效監管,一味就叫大廈業主要組織法團。

香港的立案法團,係英國制度搬過來完全失敗最嚴重的例子--就算有法團,就代表有組織嗎?就代表有維修嗎?就代表有效率嗎?法團就是一個四不像--就好似黃仁宇在「萬曆十五年」所講的明代制度一樣,香港底層的立案法團制度,就係這樣一個無法在數字上管理的混亂制度。

何謂「四不像」?法團最可怕的,就是認真想做野的人,覺得權力不足;認真想貪污舞弊的人,監管卻遠遠不夠力;負責人多數要義務工作,而出事時要負的責任卻是天文數字--例如大廈跌左塊磚跌死人,成座大廈賠幾千萬都有可能。

好啦,政府而家話好多舊樓冇法團,因此「冇王管」--佢地只係想搵個「法團」去推卸責任,因為有法團,政府就可以乜鬼都唔理,追殺人地唔交錢?搵法團啦;搞到亂七八糟家嘈屋閉?搵法團啦,真係有咩要賠錢?搵法團啦!有法團,大家就可以當事情唔再存在,就可以當任何搞到衰哂的責任,都係「一少撮別有用心」的衰人的責任,但從來冇人走去清理法團制度的漏洞,就好似古中國的地方政府,乜野都唔做,就係通過「鄉村父老、叔伯兄弟」去用「人情」解決問題,簡單而言,就係各位睇運氣啦!

法團唔係政府,因此法團的行為唔受政府監管,亦唔需要受到法院的挑戰;和政府機構最不同的是,政府機構如果有無理的行為,例如故意唔開大會就維修,例如法團委員會(最高權力機構)有不合理的行為,如果法團係直屬政府的機構,市民就可以通過法院去司法覆核;然而法團根本唔係,因此理論上一連串的「管理守則」,只係一個象徵式的法則,如果有人故意犯規,根本冇法去監督!2006 年 7 月有單終審法院的案例,事關一個法團在「不合法」的情況下通過大維修,然後事後仲要追人畀錢,法庭根據立法會通過的垃圾法律,認為法團有權力事後巧立名目,例如用「維修基金」的制度,去事後「補數」--犯規犯法呀?只要你冇實證證明佢貪污,吹咩?佢事後用「維修基金」名義,去填補之前的因為「不合法」的維修負債。

政府和立法會通過的幾條法案,真係反智到令人失笑的地步--管理公司可以根據維修的金額去抽佣,你維修得愈多,佢就賺得愈多,真正「緊急」的維修唔多,都要屈到你樣樣都修,記憶中見過一些「設計」,只係幫大廈換幾百個信箱,已經開價幾十萬,林忌不禁懷疑,那些信箱係用黃金去打造的--唔通信箱會跌親小朋友,點解要去「維修」呢?

驗樓?倒塌的樓宇 2004 年都驗過!維修,一樣有做過,問題係重要的有冇修冇人知,屈水的就成日都有好多!好多大地產商每月收的管理費、維修費,幾多年加埋加埋,可能起座新的都唔使咁貴!香港今日的樓宇問題,就係不外乎有錢畀人斬,或者冇錢等天收兩個選擇,簡單而言,即係完全沒有選擇。

更荒謬的是,以往大廈維修只需要三至五間公司入標,原本係法團只行招標,近年改左法例,變成要經「顧問公司」去招標喎,以前就係法團都仲有機會撞正有好人,佢地認真去招標做事;今日就算法團有好人都冇用,因為市面上大部份的「顧問公司」同「維修承辦商」數量有限,大家全部都係老友,就好似那些大唱片公司,以及電視電台一樣,全部都玩小圈子,以往係法團主動貪污,而家係法團被顧問公司賄賂,連唔貪都要屈你貪,最緊要係作大的工程費用,就好似以前人人貪污的明朝,政府、議員、市民見不到就當問題不存在,這樣的問題有解決過嗎?

最基本的問題,就係法團的選舉,根本冇理由交畀法團自己搞--自監自選自點票,根本係一場鬧劇;法團係社會最底層的組織--就好似以往的村長,既要有村長的權力,點解唔需要政府同法院的監管?

一個冇監管的制度,仲要加大佢的權力?冇病嘛?由大地產商、管理公司到市民最基本的「法團」,全部都變成惡犬,制度出了問題,制度出了錯,卻永永遠遠冇人走去對症下藥,東倒一層樓,就去緊緊張張驗呀驗,西塌一層樓,又扮哂「關注事件」,成為幾日頭條,然後不了了之.......

這樣的香港仲有冇未來?你話呢?

(又因過勞病了幾天,對不起讀者了)
這個小工具發生錯誤

熱門文章

這個小工具發生錯誤

最新文章

  • 當左膠變成熱狗 - 驚見「左膠御用」傳媒獨立媒體《當蔡子強變成林忌》一文,左膠不但沒有從脫離群眾,被大量原本的支持者離棄,以至被原本的同路人所質疑,以至高呼要票債票償吸取任何教訓,更反過來四圍挑起火頭,繼續人身攻擊,特別是這位當年亂寫「歧視」等法律,當年不斷亂屈「歧視法西斯」的左膠作者「稻草」。 當左膠連溫文保守如蔡子強,也要點名...
    3 個月前

最近文章

再次伸延閱讀