為甚麼呢?反對公投的泛民人士請看看,中國共產黨在公投面前,怕成怎樣的一個模樣?他們居然連選都不敢派人選,要棄選潛逃!為了打壓公投,他們居然要派人修改立法會條例,去令議員無法辭職!
好呀,那甘乃威還要不要調查下去呢?原來議員不可以辭職!奇怪哉,記得曾特首說過:「我會打好呢份工!」大家問:誰是老闆呢?
曾特首表示老闆是市民,那麼市民為何不能選擇誰當議員?議員當然可以不斷辭職,但是否再選議員入去的是誰?就是市民!看看那些土共與保皇黨的面口,他們可有半點相信選票?他們可有半點當香港人是老闆?
土共與親共傳媒,不是說補選是自殺的嗎?不是說泛民會輸兩至三席的嗎?土共不是極度憎恨社民連在議會內「搞事」的嗎?如今社民連自己辭職,哎呀,又唔畀啦!咁社民連係唔係應該日日在議會搞破壞,搞到你地罷免佢,然後先可以等選民再選佢地入去呢?
土共人人都話要補選,點知大大聲講左幾個月,阿爺一聲話唔得,就立即人人棄選潛逃,哈哈哈哈哈,誰是老闆?老闆就是北京,香港人就是北京的殖民奴隸,而這些賣港議員,全部都是賣港賊,就是靠出賣香港人的利益,飲香港人的血,收香港人的錢,再倒香港人的水,為偽港政權效力的賣港賊,就是出賣香港的港奸。怕甚麼公投呢?可唔可以解釋一下,點解連香港全民表決一件事,都咁怕呢?
為何基本法第二稿可以有公投法?為何基本法第二稿的公投法只需要 30% 的選民投票,就可以有效?為何連廣州番禺都可以考慮公投(見廣州番禺都可以考慮公投一文),而香港公投就唔得?
對呀,例如建高鐵,政府成日話「多數市民支持」,公投就係用來證明誰是「多數市民」,但政府就話公投係「港獨」啦;咁政府點解要話多數市民支持所以要做先?事實證明,政府口口聲聲說的多數市民,全部都係假的--因為只有寶藥黨等作假的,才不敢接受真實的檢驗--投票就係最公平公正檢驗多數的方法,可是我們的政府,一聽到公正的投票,就要潛逃;那些說代表市民的土共,又全部集體潛逃,可唔可以解釋一下,點解佢地咁驚投票呢?點解中共咁驚市民投票呢?
更荒謬的就係梁耀忠同民協馮檢基--你地仲係唔係泛民主派?驚乜野投票呢?驚乜野辭職呢?點解有你地唔同意的議員辭職,都要驚人地走去辭職?點解連選民投票都要驚?最初泛民的保守派「怕輸」,就話因此而唔支持公投;今日事實證明,中共和土共比泛民更驚輸,誰是正確呢?就是一直堅持公投係「誰怕誰」的我地,可是當事實證明中共更怕輸的時候,居然出現民協同街工呼籲取消公投?這是甚麼道理?
英國的國會都同樣沒有公投,但解散議會或辭職補選來重新得到民意授權,是普世認可的變相公投方式!這就是「英式議會」的公投方法!中共打茅波扮無知,土共繼續作故事呃細路,我地預左;但係泛民主派的議員如果都要扮無知,這就是連甚麼叫做「民主」都唔知道!
看看呀,今日公投大戰的結果是甚麼?就是土共的假政改變成無人理會!政府的政退方案? Who F'king Cares?沒有公投戰的操作,馮檢基「又傾又砌」多一百年,一千年,會有結果嗎?中共同你傾嗎?臨立會的時候有聽過你講野嗎?沒有籌碼,傾甚麼?唔好再呃香港人啦!今次唔公投你都傾唔到,係唔係切腹先?
香港就係有咁多傻仔--沒有反高鐵之戰,政改一早凍過水;沒有公投之戰,政改亦都一早凍過水,就係有一大班傻仔,廿幾年都唔識玩政治,被共產黨舞個團團轉,都無法迫對方去牆角--看呀,沒有李登輝同陳水扁的政治技巧,國民黨今日有機會和中共談判嗎?對唔住,連黨對黨的談判機會都唔會有,連中共怕死唔敢事事挑戰的機會都唔會有,同中共講耶穌嗎?對唔住,中共只相信撒旦,就如同黑社會一樣,只係講實力。
各位泛民的大佬,唔該好似港足一樣,踢出身價波甚至超班的足球啦!土共要修改立法會條文,唔該一條一條同佢拉布,唔該一條一條玩反修訂,舉例說,要禁止議員再參選,就修改到全香港的老闆同打工仔,和議員一樣;要禁止議員辭職,就同佢玩議程,玩哂所有野,就好似反高鐵,玩到佢地現形為止!點解呢?原因就係佢地係中共的木偶,而唔係人!因此只要阿爺未有決定,佢地立即亂跳亂叫,立時出醜!
又話補選唔係公投,咁怕咩參選呢?乜原來泛民話係公投,香港政府就當係o架啦,咁點解我地唔可以公投?話犯法,律政司出來話畀我地聽犯左邊條法律,立即告人囉,香港仲係唔係法治的社會,係由政府官員判案,定係由法官判案呢?
修改選舉法呀?好呀,基本法第二十六條規定,香港特別行政區永久性居民依法享有選舉權和被選舉權!你試下無理唔畀市民參選,用行政手段去「事後禁止」議員再參選,睇下法庭會點判?利用行政手段非法去打擊市民選舉的權利,知唔知咩「醜」字點寫呀?土共要醜上加醜,未送佢一程囉!
市民是老闆,打工仔要辭職完再畀佢做,吹呀?我係老闆我就有選擇,我鍾意呀,唔得呀?禁哂所有人參選囉,只係土共可以參選囉,出兵呀笨!
副局長、局長助理四年屈市民兩億幾;高鐵屈市民六百六十九億;四川豆腐渣工程屈市民一百幾十億,我地而家只係要求一億幾搞變相公投補選,那些次次批錢的賣港賊,就大大聲話「浪費公帑」喎。
原來,市民再投票表決民意,都係浪費公帑--不是說社民連不得人心,搞亂議會嗎?而家社民連畀次機會,令你地有機會一鋪清佢地袋,哎呀,原來最怕社民連辭職的是誰?原來是中國共產黨喎。
不如咁啦,長毛出來問下佢地,而家你想我點先?我掟蕉你又話我冇資格做議員,而家我辭職,你又唔畀我辭職,咁我係唔係日日都掟你一次,掟到你畀我走為止?
Facebook Group:廢副局換公投--全港市民瓜分副局長及政治助理三年的一億八千萬人工
做了一年半,市民對副局長同局長助理的認知度都仲係零
點解我地仲要每年浪費六千萬公帑,請 D 廢柴番來?
請支持泛民動議廢除副局長及政治助理 2010-2012 年合共三年的人工,即一億八千萬人來搞公投!餘款用來搞捐畀慈善團體,甚至六合彩的金多寶獎金,讓全港市民一齊瓜分副局長及助理的人工!
我地不如公投一下,究竟市民想分左呢一億八千萬,用來幫助弱勢社群,定係用來「利益輸送」?!!!
另外,立法會補選帶動就業,錢係用來請市民,而唔係用來請果十幾廿個人。
包括:印刷業、海報製作、廣告界、影視製作、資訊科技界等等
仲有助選員的職位、票站人員的職位,每一分每一毫使出去,都係香港市民受惠,而唔係果十幾個私相受授的副局長、局長助理。
明明可以促進全民就業,保皇黨點解要反對益香港市民,而走去私相受授益十幾個人?
各位關注公帑的朋友,請把這個訊息 forward 畀每一個香港市民,大家一齊發動要求廢副局,換公投!