支持及訂閱請按 Like

星期二, 11月 10, 2009

明報又抽香港人水

2009-11-11 最新消息:
只許州官猛漏水 不許百姓洗澡去 我本將心照日月 奈何明報照溝渠
廣東暫時毋須減少東江水供港 本港向廣東提出減少東江水供港,協助舒緩內地旱情,但廣東水利廳認為,供港東江水佔整體東江流量的比例很小,而且對舒緩東江上游的旱情作用不大,暫時不需要減少對香港的供水量。 水務署署長馬利德認為,本港的水塘存水量足以應付到下個雨季來臨,但呼籲市民要居安思危。

發展局的賣港協議:

為應付香港的實際用水需要,以確保 2009 年至2011年三年期間供水的可靠程度達99%,現行東江水供應協議所採用的統包總額方式維持不變, 而 2009 年至 2011 年購買東江水費用的每年款額分別調整為29 億 5,900 萬元、31 億4,600 萬元及33 億4,400 萬元;
(b) 維持東江水最終每年供水量 11 億立方米的目標,但達致目標的日期則有待日後商討; 以及
(c) 粵方致力把輸港東江水的水質維持於現時已提升至最新的國家地面水環境質量標準GB3838-2002 的第II 類標準。

嘩,原來政府的供水協議,係用得愈多 d 水就愈抵用;唔用水,反而白白畀錢;咩叫統包總額?就係唔用都要畀咁多!

如果東江水用得少--例如 2005 年只用了 6.17 億立方米來計算,在 2011 年每立方米的水價就高達 $5.412!

咁點解我地要慳水呢?點解市民就要連用多少少水都要內疚,但費用方面,明明用得愈多,就慳得愈多!呢個咩世界呀?

點解呢?原來如此--東江水係一間香港上市的內地公司的專利業務,又一次係利益輸送!轉載的股評分析--粵海投資(270)股價及相關新聞現金流強勁,而且收入豐厚,雖然集團近年已轉型成為一家公用企業,但供水業務仍佔總收入比重五成,單是來自東江水的收入,已達十億元,隨著粵港供水新協議達成共識,預期收入將變得穩定,同時集團有機會收購母公司基建項目,在目前的波動市中,防守性甚強。建議投資者可於現價即二元三角四仙水平買入,中線上望三元。


一份報紙反映的是甚麼價值,一個記者寫的新聞代表的是甚麼價值,好多時陰陰濕濕冇人知;點解呢?因為佢地欺負你地諗得唔夠快,因為佢地欺負你地冇做研究,於是就全心昆你。
同胞旱情急 港人用水反增 專家今視察東江 倡港研暫停供水
(明報)2009年11月9日 星期一 05:10

【明報專訊】廣東省旱情告急,珠海制水,澳門密切關注;供水予香港的東江水水位亦跌至警戒線,但因合約保證食水先供港,本地水塘存量又夠用半年,港人不愁缺水,與周邊地區告急情况大相逕庭。本報發現,香港人均每日耗水量竟逾220公升,位處已發展地區前列,較新加坡多近四成,反映港人慳水意識薄弱。

嘩!香港人用水量多呀!一定係香港人的罪啦,果然係公信第一的報紙,一見到用水多就抽香港人水,果然係代表香港人的報紙,隻字不提大陸唔理三七廿一,之前幾多年強迫香港人夠水都要買水倒落海,倒足咁多年!果然係代表「香港人」的報紙。

首先,我地睇下水務署 2007 年的舊聞:水務署資料顯示,本港每年約有百分之二十四的食水從水管流失。以每年平均耗水量九億九千萬立方米計算,有約二億三千萬立方米食水流到地底,足可填滿十三個城門水塘。以本港現時以每立方米三點零八五元向內地購買東江水的成本計算,涉及金額逾七億元。

專家更指當局若不及時維修有問題水管,食水滲漏比率將會在五年內(2007 年起計算)上升至百分之四十。水務署發言人則表示,預計全港更換及修復水管工程要到二○一五年才完成。

再看看維基百科的資料:2007年,香港的沖廁用量平均每日727,000立方米。直至2008年3月10日為止,香港有130多萬人口使用淡水沖廁,地區包括南區、山頂、西貢、粉嶺、上水、天水圍、元朗、屯門東及離島,年耗8200萬立方米。[4]^ 斥資1500萬 設再生水設施 - 明報 2008年3月10日 索取

資料仲要係來自「明報」自己!

上面鐵一般的證據證明左甚麼?就係政府帶頭浪費食水,回歸十幾年政府做左乜?政府唔知水管會變舊嗎?政府唔知水管變舊會漏水嗎?為甚麼政府要到漏成三、四成食水的時候,先來修理水管?班官員收錢做乜?食飯?瞓覺?返工時候好似環保署的高官咁去睇咸網?

東方日報 2009 年 9 月 6 日社評「本港水管大部分是鐵管,平均壽命為二十五年,但不少水管已屆三十歲高齡,更換更新刻不容緩。水務署九年前宣布,計劃更換約三千公里的老化水管,但要用二十年時間,後來縮短至十五年。須知道,中國的登月計劃可能都不需要十五年,而港府更換水管這等小事竟然比登月還要難,實在是匪夷所思,簡直可用蝸行牛步來形容。

為甚麼水務署眼睜睜看着食水流失卻不願加快更換水管呢?除了官僚主義作祟外,另一個重要原因是當局認為水是取之不盡、用之不竭的,前環境運輸及工務局局長廖秀冬曾承認,港府以往由於可以購買東江水,因此不太注重食水流失的問題,以致更新水管的工程緩慢。」

當政府有三、四成的食水係在水管浪費的時候,作為大眾傳媒,點解寧可走去鬧佢地的讀者唔慳水,卻唔係走去鬧政府唔慳水呢?就算你要鬧讀者,你係唔係應該最少用相同的篇幅,去鬧政府呢?點解我地只係睇到明報記者鬧香港人,卻見唔到佢鬧一句香港政府?

好啦,有冇人可以話畀我知水務署的數據,係包括左浪費的食水,定係已經扣除了漏了果三、四成的食水呢?如果扣除了,政府用咩比率去計算?政府係唔係一直都 update 到,我地有幾多水漏左?定係佢地都係一味靠估?其實數字已經隨時低估呢?

如果條數已經計算左「漏水」的部份,點解香港人用水多過新加玻四成?因為我地政府幫我地漏左去囉;就算好低可能係扣左「漏水」的部份,要慳水?叫政府快 d 換哂 d 管佢囉!仲有130多萬人口使用淡水沖廁--佔全港市民幾多?唔夠水,第一時間唔係應該去改水管,把淡水沖廁改做咸水沖廁呢?定係記者覺得係香港人去得太多廁所的錯,應該減少飲水,減少排泄,或者學內地部份來自農村的習慣,應該唔沖廁呢?

更離譜還在後頭:

維基資料:

「供水過剩--由於香港人口增長較預期少和香港工業北移,近年來東江供水有過量之嫌。基於合約規定,以往香港每年必須購買最少約8億立方米東江水,耗香港政府公帑逾24億元。但因為香港水塘因此而變得水頭充足,竟出現水塘滿溢的情況,在1998年至2003年期間已把約值30億港元的東江水排入大海,更引發傳媒大幅報道,稱此舉為「倒錢下海」。2005年香港各水塘總存水量為5.54億立方米,佔總容量94.64%。而於同年,因連場豪雨,導致水塘滿溢而要排出大海的淡水達1.09億立方米,如以當時東江水價計算,即逾3億元......2006年與廣東省政府落實新協議」

香港人用左佢,明報記者覺得係折墮,咁倒落海呢?邊個折墮 D?

水係用來飲的,係用來沖廁的,係用來清潔的,係用來維生必須的,就算沖涼沖多左,可唔可以減少係可以討論,但問題係唔用咁倒落海,係唔係更加浪費?明報記者係唔係忘記了,2003 年香港有 SARS?新加玻有香港近年咁多疫症咩?

一方面又叫大家多注重清潔,用咩水清潔?用屎水去溝一比九十九、一比五十?果頭讚你清潔香港人人有責,呢頭就話你地用水係浪費,係折墮,用 google search 下「香港人耗水量」,有文匯大公果 d 所謂「香港報紙」不斷報導香港人的用電量係大陸的唔知幾多倍,用水量又係大陸的唔知幾多倍,然後成幾十個簡體字的內地 website 轉載,吹到香港人係用哂佢地的資源的人渣咁!邊個屈香港人買東江水?邊個屈香港人在夠水都要畀錢買水倒錢落海?邊個國家寧可把水賣出去倒落海,都唔肯益自己缺水的人民?除了朝鮮那個無恥的國家會做類似的事--把糧食出口換錢,再叫聯合國救援之外,仲有邊個國家咁無恥?
【明報專訊】水務署資料顯示,2007/08年香港人均每日耗水量221.7公升,當中57%是食水,餘下是冲廁水。221.7公升水等於一個人連續18分鐘以花灑洗澡。

水務署指慳水不難,以一個4人家庭平均每日使用食水520公升為例,若以花灑代替浸浴,每人減少以花灑洗澡2分鐘,刷牙、洗手、洗菜、洗碗不長開水龍頭,洗衣機儲滿衣服才清洗,便可慳水44%。

對,政府帶頭浪費四成食水,帶頭無視用 43% 的水量來沖廁,仲要沖完廁之後,記者都要當冇沖過,然後計出「一個人連續18分鐘以花灑洗澡」!

就算係 18分鐘以花灑洗澡,好出奇呀?男性就少見 d,女性呢?明報記者有冇同全報社的記者做下調查,查下自己有幾多女同事花灑洗澡超過 18 分鐘?香港空氣污染源頭係邊?大陸珠三角;香港空氣污染的另一大源頭係邊?電廠--邱騰華懶理;路邊的空氣污染源頭係邊?柴油車--包括歐盟前期、一期的貨車、貨櫃車、旅遊巴、巴士--特別係來自內地,燒劣質油的柴油車。

唔知呢班記者有冇留過長頭髮?有冇聽過好多人投訴,洗極個頭都好污糟?有冇聽人投訴過,連洗三次頭先勉強覺得乾淨?你地有冇去監督過運輸署驗車?你地有冇監督過塞車造成的廢氣?你地有冇監督過地鐵站站內的廢氣指數都百幾?

定係記者你覺得,香港人而家連留長頭髮都係罪惡,又或者應該唔理會個人衛生先可以留長頭髮?

定係記者你覺得,香港人應該學大陸六十年代,人人剪個江青頭,穿毛裝,咁就唔使洗衫,唔使換衫,短頭髮唔怕洗啦係唔係?

有時間比較香港人同其他地方的用水量,專門去抽香港人水,不如花 D 心機去監督政府啦?點解明報寧可花時間去搜集不同地方的用水量,卻連最基本的功課都唔做,唔走去監督政府以及內地強迫香港買水?

無知唔係罪,但無知到呢個地步,又唔做 research,連維基都唔查,都可以畀呢 d 弱智的報導出到街,只證明兩個可能性

可能性一:明報的編輯真係廢到唔恨,已經去到弱能級別
可能性二:明報呢篇報導,根本係為插香港人擦大陸鞋而設

最後一點--正如網民在 facebook 指出,香港人要的是海水化淡廠,而唔係高鐵;我地寧可畀貴價買化淡的海水,都唔想要大陸「私捨」的東江水!

用現行科技化淡,以目前小規模的成本計,每立方米的價錢係 $8;如果大量生產,加上技術再進步,仲可以有得減!

只要換了水管,把目前三、四成的滲漏率解決(約 3 億),把淡水沖廁改用再生水(約 1 億),香港的食水量用水量,可望減到 6 億--減去水塘每年供應的 3 億食水,只需要額外三億立方米的食水。

$8 x 3 億 = 24 億!仲平過而家買東江水!(三年後的東江水價錢係 33 億!而且東江水仲要再處理!)


蘋果報導:本港耗水量增加 東江水將不敷使用 將軍澳擬建海水化淡廠

供港東江水未來三年狂加價
年份:2008水價(元):24.948億累積加幅:-
年份:2009水價(元):29.59億累積加幅:18.6%
年份:2010水價(元):31.46億累積加幅:26.1%
年份:2011水價(元):33.44億累積加幅:34%

據了解,現時廣東省收取供港東江水水價平均每立方米約3元,三年後便加至4元,若計入本港輸水成本,每立方米食水輸送到用戶的成本將增至6元。目前的家用水費,以一家四口計每月100多元。政府已訂定用者自付原則,目前水費只收回約一半成本,兩年後水費凍結期結束,市民無可避免會面對大幅加水費壓力。政府消息說,屆時政府會分階段調整水費,減低對市民影響。
(注:蘋果的數字是以香港用足所有十一億立方米計算,以 2005 年的東江水用水量計算,則高達 5.42 元,未計淨化的價錢!化淡就唔需要再淨化!)

水務署曾研究海水化淡及污水淨化,海水化淡成本每立方米需8元,污水淨化至可飲用更需8.5元,但兩種技術的成本正下降,將來很可能都會引進,政府亦已在將軍澳預留海水化淡廠用地。
買東江水兩年變相多付20億 定額付款 實際供水量僅上限六成
2008年1月3日【明報專訊】粵港於06年簽訂的供水協議,本港每年須支付定額約25億元公帑購買東江水,但06及剛過去的07年,卻分別只輸入6.17及7.15億立方米東江水,實際供水量僅及協議輸水上限11億立方ç 的六成,兩年用不盡的「配額」總值近20億元。有立法會議員認為,粵港的東江水供水協議將於08年底結束,港府應爭取訂出每立方米的水價,以免買貴水。

以過去兩年的實際供水量計算,每立方米水價高達3.49至4.04元,遠高於06年前舊協議價的3.085元。(未來三年則隨時升到 $5 以上)

雨水足反變買貴水

水務署發言人表示,過去兩年,本港及廣東省均「水頭充足」,為了避免浪費資源,故減少東江水輸港。以06年為例,全年供水總量為9.63億立方米,本港供水高達3.46億立方米,佔整體36%,為過去10多年最高。他強調,本港水塘會因應「能力」供水,並維持一定的儲水量,即使在東江水「斷水」的情況下,仍可確保持續供水一段時間。

最過癮係發展局最新協議的條文 (b) 項:
「維持東江水最終每年供水量 11 億立方米的目標,但達致目標的日期則有待日後商討」

澳門買西江水係香港東江水的四分一至五份一價錢,新加坡向「鄰國」馬來西亞買水,係幾百分之一的價錢,我地買貴水,仲要被當施捨的,點解我地唔自己化淡?

香港人到今日都達唔到呢個目標,唔係叫我地慳水咩?我地慳水咁發展局點達標呀?以 2005 年的東江水用水量計算,我地要用多一倍水,先可以達標喎!

叫我地慳水,又同時搞一個 2005 年東江水用水量兩倍的目標叫我地去用?點用呀?倒水落海呀?


仲延閱讀:
唐英年一億人毀滅香港計劃
東方日報:港府任由水長流 年年倒錢落大海

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀