支持及訂閱請按 Like

星期六, 11月 21, 2009

1994 年的唐英年講過乜?

十五年前,即 1994 年的唐英年,於辯論彭定康政改方案的立法局會議上發言:

「基本法附件一附件二列明,到了 2007 年,港人係有自由決定立法會將會點樣組成,我深信到時候,港人係會要求有六十席直選(議席)」

各位有冇試過借錢畀親友,欠你數十五年唔還,唔單止唔肯還錢,仲叫你撕爛張借據,畀個口頭承諾畀你,再還幾蚊雞畀你,再聲大夾惡同你講:「有幾蚊雞袋落袋,都好過冇呀,你追左我十五年,都係原地踏步,而家畀幾蚊你買包野飲啦」

你打算拒絕,條友仔仲同你講:「拿,係得咁多o架啦,張借據寫明,要循序漸進分期還o架嘛,拿,你而家唔肯撕爛張借據,唔肯收我呢幾蚊雞,我就十一年後都唔會還錢o架啦!」

告佢?唔得,你好激進呀,告人好激進o架!通知所有朋友話呢條友係賤人?唔得,你好激進呀,話畀其他人知佢欠數唔還,佢會「老羞成怒」,以後都唔還錢o架!

寶藥黨都係呃你一次,而家佢地班友己經呃左你十五年;人生有幾多個十五年呢?係唔係呃你一世先開心呢?如果有條友呃你十五日唔還你告佢,就係你激進;如果有條友借你錢唔還十五年,都唔肯還,追數叫激進?告佢叫激進?

肯容許人地走你數十五年唔還,連應承你等多十年後還都唔肯,你都仲走去應承佢,呢 d 唔係叫「溫和」,係叫弱智、弱能、又或者粗 d 講句,抵你死啦!

例如有位方志恆兄,就話我地呢 d 搞公投的人叫激進;方生,你借廿萬畀我,我三十年後還畀你啦,冇利息o架喎,好唔好?

彭定康政改,唐英年班友就走數投反對票;六十席直選又投反對票,原因係佢地話中央應承左大家 2007 年有;今日係 2009 年,佢地連應承你 2020 年一定有都唔肯,咁你仲信佢?

就好似全世界唔還錢的債仔一樣,佢地可以畀一億個唔還錢的理由;呢班友最叻係乜?就係「輸波賴地硬」--哎呀,你串左佢一句,所以佢就唔還錢畀你;哎呀,你冇同佢講早晨,佢小氣,所以唔還錢畀你。

唔怪得香港人多左個花名叫港燦,因為全世界都冇乜幾多傻佬,會畀人呃十五年,都願意畀人呃多十五年。公投為左乜?就係為左通知全世界,中共係一個欠債唔還錢的福佳,呢條福佳擺明唔還你錢o架啦,而家左又係冇錢收,右又係冇錢收,咁我地仲講咁多做乜?仲做哈巴狗多十年望佢「浪子回頭」?你弱智o架?

點解要公投?就係通告全世界,中共你再唔還錢,就聽個名臭啦,就聽全世界知道,中共係一個毫無口齒,毫無誠信,毫無半分可信性的「賭能」,走數走十幾年,你仲同佢賭?你仲同佢玩?你仲同佢做生意?

傻的嗎?

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀