比較甘乃威與國際領袖緋聞

林忌新戰略構想：土共想迫甘乃威辭職？好呀，民主黨快 d 宣佈以退為進，先以甘乃威辭職，來做普選公投的工作，由民主之父李柱銘參加補選，來領導民主公投！

香港常以英國的制度為榮，可是香港的社會價值，卻是一個怪胎，既不中又不西，甚至在有些方面，是取其所最差的。

最可笑的一個論點，就係說一個政治人物交代佢私生活不清不楚，就係冇誠信，就係不可信任，應該要辭職。

真的嗎？這是邊個地方的慣例？這是哪一個國家的道德倫理？香港共和國？

看看中國，幾日前在天安門城樓之前面掛著誰的相片？毛澤東搞江青，乜唔係婚外情咩？乜唔係人所共知的「不道德行為」咩？點解人民幣仲印住佢個樣？乜唔會教壞細路咩？

仲有在城樓上面，果位更近期的搞婚外情的人是誰？江澤民包二奶幾乎係內地人所共知的舊聞，人名就唔開啦，咁點解我地香港的報紙冇一份更挑戰老江？要佢下台辭職？定係香港人個個都搞港獨，認為香港人唔係中國人，中國的領導人同佢無關？

再數早 D，孫中山三段婚姻，佢同後來做左中共國家副主席的宋慶齡，最初都係婚外情呀，咁我地點解仲要尊重孫中山？點解我地仲要叫佢國父？點解仲有好多學校放「孫中山壽辰」的學校假期？佢咁唔道德，做咩國父呢又？

道德？咩道德先？中國人的道德？中國人的道德一向就係三妻四妾，呢個就係中國幾千年的傳統，點解要被「西方列強」控制呢又？

好啦，就當係共產中國都實行一夫一妻制啦，咁老毛呢？咁江澤民呢？點解我地偉大而中肯的傳媒，提都唔敢提佢地的「婚外情」呢？

好啦好啦，我幫你搵個藉口啦，就係甘乃威係民主選出來的，所以同上班班獨裁大帝唔同。

真係？法國總統不斷同佢下屬搞婚外情，意大利總理搞到全國皆佢，佢老婆公開鬧爆佢，佢 d 選民都不為所動，點解呢？

好啦，我又再幫你搵個藉口啦，法國、意大利佬係外人，我地又睇下英國點樣好唔好？

以城市對城市，我地又再搵倫敦市長 Boris Johnson 來比比，好唔好？

Boris Johnson 在 2004 年被揭發公開在報紙講大話，已婚的身份仲搞大另一位女士的肚，仲畀錢人地落仔，要被當事人的母親踢爆，才急急承認之前的「否認」係大話。

So what？當時的 Boris Johnson 都係保守黨的國會議員，英國保守黨有冇要求佢辭職？冇；英國的傳媒有冇要求佢辭職？冇；保守黨做左乜？都只係炒左佢的「黨職」，結果佢的政治前途點樣？四年後一樣高票當選倫敦市長。

講到呢度，我真係好想問下要求甘乃威辭職果班人，咦？你地自稱的道理，係咩地方的道理呢？邊一條法律？邊一條鄉村的條例？邊一個國家的真理？

中國唔使辭，英國唔使辭，連克林頓做到美國總統，都唔使辭職，我真係唔明，香港的立法會議員有咩咁「巴閉」，對道德的要求居然高過哂英國、美國、同我地的祖國。

點解呢？因為發達的民主國家的人民知道，一個政治人物的私生活，同政治人物的能力無關；我地點解要選議員？係因為我地需要佢幫我地做政治的事，而唔係做聖人。

我真係好想知道，例如甘乃威幫左咁多人，例如雷曼苦主，例如連曾特首同民主黨開會，都特別點名走去問甘乃威問題－－如果係你，你會點處理... 有關金融監管的問題，連水管爆左，一眾「政治任命」的局長、副局長冇影的時候，都係甘乃威出來，我真係唔明，究竟甘乃威的私生活，會點樣影響到佢的做野能力？

真係好奇怪，例如民建聯的立法會議員，多次公然講大話，例如承諾佢地支持 07 08 雙普選，最尾又反口，點解冇報紙用追甘威的方法去追殺佢地呢？點解政治問題反口，就冇人理，但係私生活「前後不一」，就係天條大罪呢？

點解議員在議會瞓覺，局長在議會打機，我地的傳媒都覺得當事人唔使辭職？但反過來，原來佢已婚而向人表達好感，就要辭職？

定係香港人覺得，我地的政治道德水平勁過英美，領袖的條件高過中國領導人呢？