支持及訂閱請按 Like

星期一, 8月 03, 2009

曾特首 vs 倫敦市長

八月四日轉載:Taiwan can learn from Hong Kong, by Kay Lam (林忌)@Taipei Times

大家都係七百萬的城市之首,香港擺明係抄倫敦的設計,但用香港的曾蔭權同倫敦長市 Boris Johnson 比一下,第一點諗起的,就係曾蔭權係英國的爵士,但係 Boris Johnson 只係英國的平民。

貴族對平民,但係曾爵士最多只能狗噏贏人,大家都做市長,Boris Johnson 都仲可以寫專欄評論時事,今日林忌就想同大家分享呢位倫敦市長的一篇文章,非常切合香港的主題。

"We are now so spineless, I will never see a man walk on Mars",廣東話翻譯為「而家我地真係冇腰骨,我呢世仔都見唔到人類登陸火星」

會用火星來評時事,唔係硬膠的專利,人地做市長都可以引火星為喻,你估人人都好似香港果班懶正經的偽君子咩?但篇文章講乜呢?

篇文大意係講,今日的人類,已經膠到連勇氣都冇;四十年前人類用阿波羅十一號去登陸月球,有研究過艘太空船,就知道有幾原始,原始到如果放在今日,一定冇人敢去發射登月;偏偏登月四十年啦,點解到今日都冇國家計劃去登陸火星?人類發生咩事呢?點解技術遠遠進步左四十年,但係我地的勇氣卻好似只退不進呢?

Boris Johnson 寫火星講勇氣,係想比喻今日的社會膠到冇朋友,英國工黨就最近搞了樣硬膠政策,係用來「保護兒童的」--講到呢度大家應該諗起,我地香港最近又係好興「保護兒童」!

英國搞邊科呢?就係一個甚麼成人去學校的登記制度--為了防止性罪犯,所有去學校超過三十日的成年人,都需要在國家的 database 登記,Boris Johnson 筆鋒一轉,就盡情去恥笑呢個制度的荒謬,學校的教師呀、社工,點樣去查證咩人有登記,咩人冇登記呢?係,保護兒童係應該,但係呢度制度係唔係膠到冇朋友?佢舉例:如果美國登月英雄岩士唐如果去英國的學校巡迴演講,係唔係都需要通過英國政府的登記制度,去確保佢唔係性罪犯?呢個制度係唔係突顯了一大班乜都想規管的人的荒謬?

當然,倫敦市長連呢一個在香港好似「好正常」的制度都會鬧爆,但係香港人就會覺得好正常;諗清楚,人地英國都話哂係規管成年人,但係我地香港呢?當然唔會規管成年人啦!佢地只會規管學生,規管青少年之嘛!

明報荒謬版:團體促推「校內自願驗『處』」計劃 文章日期:2009年8月2日
【明報專訊】近日援交問題益發嚴重,引發社會上關心青少年的人士憂慮。香港捍衛道德聯盟振臂一呼,建議政府仿傚即將推行的「校內自願驗毒」計劃,實施「校內自願驗『處』」計劃。

唔好當係真新聞,呢段新聞係假的,目的就係用來諷刺咩校本檢毒的荒謬,也難怪香港的天主教會都開聲反對唔參加,原因就係呢個計劃本身就係膠到冇朋友,最適合就係學生申請司法覆核,推翻政府的荒謬決定。

今日終於有傳媒開始用腦,終於諗到如果有學生缺席避驗毒點算喎!我真係好想問下,究竟班大帝同官員,有冇用過腦o架?你地有冇設身處地如果你係吸毒的學生,你會點樣做?

你會
A. 等你驗毒,然後被學校發現記過
B. 唔參加驗毒呢?

呢班大帝脫離現實好耐,佢地梗唔知道今日的校園係一個咩世界;驗毒驗到有,你估唔會通天?今日老師同學生 MSN 又有,成班學生學哂你地政府班膠官的衰野,一堆堆圍住老師來擦鞋搏上位的大把,老師利用學生之間搞小圈子的亦大有人在,你估而家仲係幾十年前呀?

知唔知校本驗毒最衰係乜?最衰就係通知學校!不但製造走漏風聲的危險,一來學校會點處置班學生,政府既理唔到,亦冇方法理得到,山高皇帝遠,去到咁基層問題一出現,搵幾個走去跳樓,唉,慘無人道,慘絕人寰呀!

學生的人權呢?對唔住,再一次證明特首的「大家長霸權主義」,只要家長同意左,好似在法律上學生就成為了「非人」,而沒有選擇的人權--原來家長同意,就叫做「自願」,仲有人敢稱之為「自願驗毒」,真係唔知想呃邊個?

Boris Johnson 篇文最大的啟示,就係問大家有冇勇氣去解決問題--有冇勇氣去面對困難的挑戰,即使係好困難好,有決心去做,又點會做唔成?而家我地的政府似乜?教而不善,永遠只會刑求重典,乜都強制,乜都強迫,乜都重罰,這些行為本身就係最無膽,最無能,最不知所謂的表現,因為佢地心怯,對自己冇信心,因此連對小朋友都冇信心,覺得唔用強迫的手段,唔用「重手段」,就乜都做唔成,就乜都解決唔到。

因此,四十年前用最低限度的技術,我地可以登陸月球;四十年前的香港,小朋友可以走街跑,天生天養都養得大,可以有最大的自由去追求自己的夢想;四十年後的今日,家長乜都要管,家長乜都覺得好危險,家長乜都要用佢地自己的「自願」,去規管小朋友的前途。

點解到今日都仲有咁多人懷念港英?照下鏡啦土共!
這個小工具發生錯誤

熱門文章

這個小工具發生錯誤

最新文章

  • 當左膠變成熱狗 - 驚見「左膠御用」傳媒獨立媒體《當蔡子強變成林忌》一文,左膠不但沒有從脫離群眾,被大量原本的支持者離棄,以至被原本的同路人所質疑,以至高呼要票債票償吸取任何教訓,更反過來四圍挑起火頭,繼續人身攻擊,特別是這位當年亂寫「歧視」等法律,當年不斷亂屈「歧視法西斯」的左膠作者「稻草」。 當左膠連溫文保守如蔡子強,也要點名...
    3 個月前

最近文章

再次伸延閱讀