支持及訂閱請按 Like

星期三, 8月 05, 2009

由o靚模看香港衰亡

人神共憤!點解?點解?點解o靚模可以「上位」?太可惡啦!無恥!下流!下賤!乞人憎!不知所謂!(下刪一萬字)

一向林忌對娛樂版半分興趣都冇,不過今次見到周秀娜的成功,卻感到很驚訝,居然到今日才有人用呢條橋,而更驚訝的係,居然到今日呢條橋成功,都會被萬箭穿心,人人抽水怒插。

當然好多小市民的單純厭惡,如接近三十或開外的未婚女性,如理想國的社運人士(Issac 張真人等),如衛道的明光大使,如正義的朋友--比林忌更目不邪視,同時不煙不酒不賭不好色的真君子大俠之外,點解連娛樂界那些三姑六婆,那些亂七八糟的「偽人」都出來抽水?

香港人,你地醒未呀?圍插o靚模的藉口千奇百怪,由教壞細路到「冇資格」、「唔專業」乜都有,前者陣間先講,後者真係令人感到很好奇,乜原來做下「產品代言人」,都一定要交畀「Top model」去做?乜香港的「Top model」幾時唔做時裝,改做廣告呢?原來因為有班友叫佢地做o靚模,佢地就等如成為了好似「印度種性」的新職業!作為「模特兒」之一種,因此就要有 Top Model 的質素!神呀!中國人的邏輯發展,已經去到一種天才級數,就係做唔到 Top Model,就冇資格做 Model;冇資格做 Model 而做左 Model,就係殺千刀的大罪,要日日圍剿,天天圍插,捉去浸豬籠呀!

冇資格的「廢柴」,突然紅爆升上神檯,乜原來係今日的事咩?當年--1992 年出現三位唔識唱歌的「四大天王」,乜香港仲有樂壇咩?好,就當大家係睇郭天王跳舞而唔計,黎明賣乜?劉華賣乜?冇錯佢地或者係好好的演員,但係唱歌?唔好講笑啦,黎天王劉天王的 fans 追殺都一樣要照直講,對唔住老實都要講一句:佢地到今日都唔識唱歌,佢地到今日都仲係賣緊樣--或者係食老本,你問下家下有幾多 20 歲下的小朋友買佢地唱片?你問下今日有幾多「非 fans 」係欣賞緊佢地的「歌聲」?

點解我地個社會可以虛偽到今日都冇敢企出來,指出香港人自九十年代已經迷失,由演員到歌手,靠賣樣的佔大多數;唔單止女星賣色相,連成龍露股都曾經係娛樂版的大賣點,連唔知咩男星著泳褲,港男的肌肉 show,都可以一樣係大賣特賣;唔該唔好呃自己,唔該唔好再係度狡辯,由始至終泳裝都係賣緊「性」--游水唔該落水,唔落水著泳裝,即使著緊衫其實都係賣緊「性欲望」,只不過係被認為係「低等」的「性欲望」,或者被認為係「高等」的「神交」--和英俊或漂亮的明星「擁有渴望」、「共諧連理」、「成家立室」等等的幻想--而幻想的背後,其實都係性擇的動力,無論你係用達爾文的觀點,或者佛洛伊德的角度,其實都係同一件事。

當九十年代的娛樂版係度報葉子媚的 36 吋上圍,仲幫佢改個「波神」的稱號,我真係唔明白點解今日的傳媒可以當冇事發生過,去大鬧今日的o靚模;當九十年代的幾個前港姐、前亞姐,一個一個走去拍三級片露點,仲有葉玉卿在黃金時間的電視台節目上面唱咸濕歌,李麗珍拍露點寫真再拍三級片,我真係好想問,呢班「藝人」其實係賣緊咩「藝術」?我地偉大而高尚的戲院,點解唔拒播呢 d 淫賤電影?連今日成為演技派的舒淇,最初靠咩走紅香港?就係拍三級咸片玉蒲團!

今日的o靚模同佢地比有咩唔同?有,就係冇露點,就係再後生一些,但後兩者係唔係罪呢?當年全香港的報紙娛樂版,都係大賣呢幾位拍咸片的女星之時,今日呢班睇呢 d 野大的成年人,掉轉頭走去鬧o靚模?我真係唔明,點解當年的同一堆報紙,同一堆傳媒,同一班「君子」家長,佢地做緊乜?今日果班阿爸,有幾多個當年唔係走去沉迷呢班呢種級數的「人體藝術」?話佢地影響社會風氣?係囉,點解今次佢地要咁忍唔住出來大鬧特鬧?點解?

原因就係回歸前後,香港男性的興趣,開始由本港的女星轉移去外國的女星,日、韓、台甚至美、英劇集的流行,比起香港那些千篇一律的面孔吸引多了;而日本的 AV 產業,更係徹底毀滅了香港的咸片事業,1997 年一個 AV 女星夕樹舞子來旺角宣傳,都吸引過千人圍觀,引為國際奇談--日本人都 O 哂嘴!

就係呢個時候不久,由港產片、唱片業到成個娛樂界都開始日益萎縮,點解香港人唔再沉迷港星?點解香港人寧可迷外國的偶像?成個香港娛樂界有冇檢討過?冇,佢地繼續都係果套,繼續迷戀八、九十年代風光一時的歲月與方法,繼續同 CCTVB 呢 d 共生企業玩壟斷,繼續只用一個大台,一個爛台去綁住老觀眾;套套劇集千篇一律,就好似 X 夢園果 d 王子公主故事,只不過係換了背景再炒一次;套套電影都似曾相識,只係由黑社會斬警察,改做警察斬黑社會的荒謬版加強故事,難得來了套迴光返照《無間道》,集九十年代的所有優點於大成之後,就從此無以為繼;佢地面對呢個結果,唔去檢討自己的問題,卻一味怪科技--令觀眾選擇多了,令觀眾可以盜版,可以 BT,到今日就連免費都冇幾多個人肯去睇、肯去聽啦--仲少過以前要畀錢好多倍。

好啦,終於有後生女引進呢幾年日、台、韓流行的,只不過由雞仔聲走音亂唱歌,改為係扭幾扭亂擺 pose,原本都無傷大雅,CCTVB 都仲搞美女廚房去幫手推廣!之不過改朝換代之勢一發不可收拾,原來呢五年十年在外國流行果套,一搬番香港就會大 hit!原來迷外國賣樣的偶像,都可以變成港產賣樣!死火啦!點算呢?收視保證師奶日日對慣的,都唔係呢個歲數的o靚妹;娛樂大老控制的,都唔係呢 d 可以靠賣自己樣拍下寫真,就可以大紅大紫的小妹妹!弊!佢地如果改朝換代,班三十歲的姐姐食乜?班四十歲的姐姐以後賣乜?

於是所有相關人士,人人都搵藉口抽水打沉佢地,抽水的密度,就好似上年老屈莎朗史東一樣,就好似和北京拉隊咩為國加油為黨打氣一樣,殺呀!全面封殺呀!點可以畀你班後生仔走出來?當更靚、更高學歷、更識得打扮同包裝的o靚世代出山,今日的老人政治仲邊有地方企?那些「中生代」--夾在兩代之間等左好多年都上唔到位的,又邊仲有地方企?那些捧慣今日偶像,如果偶像被擠下火線,佢地又仲有咩人可以追?冇理由追一個細自己咁多的妹妹仔o架?(中坑例外)。

這就是上世代最無力的最後反撲--就好似李學斌的文章所講:
『香港號稱是世界數一數二普及上網的社會,然而翻閱調查機構Nielsen的報告,卻會發現,自千禧年以來,香港上網人口普及度,一直保持在7成左右。這意味着近年網絡面貌變化雖大,影響卻只觸及經已上網的人。3成沒有上網的市民,跟其餘7成網民,距離愈拉愈遠,彼此之間的共同話題,仍綁在傳統媒體的框架以內。

facebook至今已有200萬個香港用戶,可謂滲透度最高的新媒體。幾乎所有在學人口都已被拉入facebook,再大十歲的青壯年勞動人口,也有7成人纏綿於此社群內。可憐我們社會那些45歲以上的「話事人」,只有6%登記了facebook帳號,難怪他們對於網絡文化多不了解,總是嗤之以鼻。』

這種現象是獨特的,美英、台灣、日韓都冇呢個問題,但係偏偏香港就有呢個問題,原因就係來自香港雖然有七百萬人口,可是我地卻擁有最強的傳媒寡頭壟斷的陣容,配合人口老化的現象,令香港各行各業的改朝換代,由二千年至今最少停止了十年。

壟斷的結果,就係年青人更加「外求」--香港沒有,去外地搵吧,人地的更快、更新、更好,點解仲要睇你香港的傳媒?年輕一代口味轉了,老的不走,就連同傳媒都一齊坐沉船。CCTVB 當然知道得好清楚,因此佢地上年明明賺大錢,都要大裁員,除左佢地無良,當然係陳志雲比其他發夢的人醒十倍,一早知道遲或早,呢條船一定會沉。

o靚模之所以如斯田地,原因就係傳媒與娛樂界的老化;早幾年都仲有大老人,會把這些新人「包裝」,例如先學學跳舞,再學學唱歌,以「歌星」名義出道,又或者以「演戲」出道,簽下賣身契就梗,有咩背後交易就大家自己諗;但係衰就衰在,今日媒體老化到,連大老闆睇中的新人,都唔會再紅--因為成個媒體已經老化到,繼續睇的人都一齊老化,大家都唔想再接受新人啦,就好似報紙傳媒一樣,大家都只係無限地熱愛老面孔。

o靚模今日靠炒作,但係炒作之後能不能繼續存在,就係靠實力;舒淇、葉玉卿如果冇拍過咸片,佢地咁易紅咩?o靚模在今日的制度下走頭無路,到頭來都只係拍「三點不露」的寫真,,可是就係偏偏唔合已上岸人士的眼,就係唔順今日呢個「後浪」終於推倒「前浪」的現實。

連歐洲最後一個共產黨政權都要倒台了(摩爾多瓦的七月選舉),連日本的自民黨都面臨必敗的選舉了,我地香港呢班權貴,都仍然未夢醒,都仍然眷戀夕陽無限好,偏要在黃昏結束前繼續倒行逆施......

壓力愈大反彈愈大,濫用藥物會有抗體,不知己不知彼,老而不到頭來,只會死得更慘,敗得更快,又何必呢?

伸延閱讀:
陳大文部落--o靚模照妖鏡

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀