呂智偉再次扭曲歷史

呂智偉在港台節目《左右紅藍綠》之中大發膠音，指六四事件經過外力介入變質，因此全球華人對五四以及六四的評價不一云云。

對，為何今日的華人只鬧六四，唔鬧五四呢？就係因為 1919 年的五四運動，近千名學生被捕，特別在 1919 年 6 月 4 日北京有七百名學生被捕，最終都在 6 月 5 日全數獲釋，北洋軍閥沒有開槍，沒有殺人，更沒有秋後算帳，因此學生唔使走佬，學生領袖唔使坐監，唔會被呂智偉風涼咁講話佢地去左美國。（吾爾開希在台灣，王丹都在台灣做客座講師，原來呂智偉認為台灣成為美國的一部份？）

係囉，1919 年的 5 月 4 日，「學生遊行隊伍在交通總長曹汝霖家，痛打了駐日公使章宗祥，並火燒曹宅。」即使政府高官被學生痛打，北洋軍閥的政府也沒有以此為理由，開槍屠殺學生！和那些今日天天說是學生先動手，說有人燒軍車的虛假指控，就算全部屬實，比起 1989 年六四事件七十年前的五四運動之中，中共的反應仲要衰過北洋政府一百倍，一千倍，一萬倍。乜中國人連五四時代都不如？乜中共連北洋政府都不如？乜中國的人命仲賤過北洋政府的年代咩呂智偉？

呂智偉說：「九十年前的年青人明白國力弱無外交」－－對，九十年後的今日，呂智偉之流的土共，面對菲律賓侵佔南沙群島，面對日本侵佔釣魚台，佢地自稱「好繁榮」的「強國」，到今日都係冇外交，而冇外交之餘，呢班人渣仲可以當冇事發生，既唔保釣，亦唔保南沙，乜中共連北洋政府都不如咩？點解五四運動堅持對主權不可退讓，今日呢班呂智偉之流大讚之餘，卻連對釣魚台問題不發一聲？呂智偉為何更對香港政府禁止保釣人士出海不作一聲？

土共說六四運動受到外力介入，口說了二十年卻半點證據都拿不出來；反過來看看，中國共產黨又如何借五四運動，引入蘇聯的勢力去推翻中華民國政府呢？五四運動的其中個重要領袖－－陳獨秀就是中國共產黨的創建者及首任總書記，1919 年 6 月 11 日，距離政府於 6 月 5 日放了學生之後，還到北京前門外鬧市區散發《北京市民宣言》，聲明如政府不接受市民要求，「我等學生商人勞工軍人等，惟有直接行動以圖根本之改造」－－直接推翻政府的政變聲明（八九六四學生從來冇發出過類似的聲明）！仲有，五四運動的其中一個學生領袖，佢就叫做周恩來，當時佢係天津覺悟社領導人，後來仲成為了毛澤東的得力助手出任總理，而六四事件血洗天安門其中一個要負最大責任的人－－當時的總理李鵬，就係五四運動學生領袖周恩來的契仔！七十年前有份參與打高官，燒高官家，發表政變聲明的周恩來，佢個契仔就在七十年後下令殺學生，你話啦，五四運動同六四的分別，有幾咁大呢呵？

陳獨秀、周恩來之流，就係勾結外國勢力，接受蘇聯的援助，甚至接受蘇聯的軍事訓練，提供武器，在廣東省同孫中山合作，後來一齊出兵去用武力推翻當時位於北京的中央政府！比起今日的學運領袖走去做 CEO，走去從商，走去做教授，你話分別幾大呢！原來呂智偉好唔順眼今日的學運領袖唔去接受外國的軍事援助，好唔滿意學運領袖唔走去用武力推翻中國的人民政府！

用呂智偉的標準，五四運動就係赤裸裸接受外國的軍事訓練推翻人民政府啦，外力介入的係五四運動，唔係六四！呂智偉，你係唔係唔識歷史呀？定係你同日本的軍國主義者一樣，專門篡改歷史？

比起五四運動之後，北洋政府於六月十日撤銷交通總長曹汝霖、駐日公使章宗祥、幣制局總裁陸宗輿的職務，而錢能訓的內閣，更於一九一九年六月十二日全體請辭；中共呢？同情學生的趙紫陽，自五月十九日見完學生之後，就被變相政變奪權，更被軟禁在家；殺人兇手呢？五四示威學生領導周恩來的契仔李鵬，不但沒有辭職，仲被揭發係「四二六」人民日報社論的幕後黑手。

從五四到六四，中國不但沒有進步，還向後急退千百步！多謝呂智偉的曲線，幫助香港人認清五四運動和六四運動的分別，知道作為民運領袖，原來不應從商，而應該學陳獨秀等接受外國資助，去推翻中央人民政府！


重溫呂智偉之前的謬論

城市論壇更搞笑，一位叫做呂智偉的暗土共組織「香港青年發展網絡」的召集人，佢曾疑似參與「希特奶」葉劉的助選團和陳太的義工發生身體衝突，令陳太的助選團成員倒地報警以外，還在片中指出六四屠城是錯誤的說法，因為南京大屠殺，一百萬人死了三十萬才叫屠城云云，六四由「幾十、幾百、幾千」的說法，不足稱為屠城。

林忌聽完之後覺得佢真係好鬼死過癮，用番佢相同的邏輯，其實沙士唔係疫症！H1N1 唔係流感！點解呢？黑死病在十二世紀殺死歐洲三分一的人口，就好似南京大屠殺的比率相同，因此沙士只在七百萬香港人之中殺死 299 個，又點算疫症呢？拿又再舉多個例，1918 年的西班牙大流感，殺死左約二千萬人，因此目前只死得幾個人的流感，用呂智偉的偉大邏輯，又點算流感呢－－流感者，流行性感冒也，二千萬人叫流行，三幾個人又叫咩流行呢？

仲有，呂智拿話六四死傷者有解放軍，就正如沙士同西班牙大流感之中的死傷者，其實大家唔應該忘記除左人之外，仲有細菌！你話係細菌殺死人，定係人殺死細菌呢？定係用以上面班膠人的偉大邏輯－－如果唔係人的免疫系統主動攻擊 d 細菌，細菌又點會還手呢？所以說，細菌殺死人，人－－特別係負責指揮人的腦部，就好似學生領袖咁要負上最大的責任！！！

呂智偉的說法，果然和日本否認南京有大屠殺，以及新納粹份子否認有猶太人大屠殺，死亡人數被誇大係同一路數，萬變不離其宗，果然係希師奶的支持者，欽敬欽敬！

黃世澤：認住呂智偉呢條福佳
孫中山走佬十次又如何？