支持及訂閱請按 Like

星期二, 3月 17, 2009

港男港女之上進篇

上集講完港女背後的港媽大受歡迎,今集就談港男的問題,特別係港女幾乎人人認同的「上進心」問題。

正如港男鬧港女,往往鬧到非常流於表面的情緒化之外,港女之鬧港男亦如是,所謂「上進心」問題,其實可以分為兩大類,第一類就是表層的「上進」問題,好多人的「上進」,其實就係「錢進」;例如陳冠希果類,冇人要求佢「上進」,因為有錢,就係「俊」--用金庸男主角來比喻,就好似楊康咁,理得佢認賊作父,一樣會有無知少女說:「同佢影裸照的女明星,好幸福呀!」

但另一方面,唔通個個女性都咁冇道理?點解佢地成日都要講港男唔上進?除左社會階梯,搵唔到錢等基本問題,常聽到的問題,就係指責港男只係大細路、幼稚、而表面化的象徵,就係迷戀動漫、模型、打機、睇波等「佬味」玩意,和女朋友也三句不離玩具,除了熱衷於和異性進行肉體上的交流之外,心靈上的交流少之又少,女性想講心事,男性除左「哦、哦、哦」之外,一係就唔明白女性要求的係情感抒發,誤以為自己係巴士阿叔,一聽到問題,個心就大叫「未解決,未解決」,急於「解決」女性口中的問題--其實人地只係想你聽,想你認同,而唔係想你解決問題--講到呢度,佢又去左打機:「打緊大佬呀,遲 d 先講啦!」

長不大的大男孩
對了,女性口中的「上進」問題,除了金錢、權力、地位以外,就是一個可以分擔、分享、分憂的伴,比起台、韓、新受過軍訓的男性,港男極度欠缺的,就係獨立性--香港家長教仔,有幾多個會教「獨立自主」?在外國的男性,自細就周山周街跑,以往在中國貧困的日子,一眾港爸的童年,亦大多屬天生天養,能夠留低長得大的,都吃過苦,學識如何獨立自主解決問題;望望香港的環境,有機會好似外國的男孩咁有空間地方,或者好似六、七十年代的環境般,讓男孩周街跑周街玩,去發展獨立的精神嗎?連小學都要搞全日制,讀完書以外就是「課外活動套餐」,甚至連玩乜都要由家長控制,另一方面再配以「即食」的遊戲文化,和以前要動腦筋搵野玩不同,今日的男孩只愁唔夠時間玩,而家長寧可見到佢在眼前打機,都好過出街怕「畀人教壞」,這一切一切,都是製造終極電車男的元兇,港男長不大,中國膠家長的責任有人探討過嗎?

中國人家庭的確係極度關注小朋友的發展,今日長大的一群,就係八十年代香港經濟起飛了,受到極度關注的一群,好聽說是關注,難聽說就是控制,由讀甚麼、學甚麼、以至課外活動參加甚麼,都由港媽與港爸一手包辦,就好似古時那些富家大少爺咁,乜都唔識做唔願做亦唔學做!男性的成長和女性不同,往往靠經驗、嘗試與磨練,可是香港的教育制度,以至社會要求,都只是要求港男做「應聲蟲」,而非訓練獨立與自主--在家聽父母話,在校聽老師話,返工聽老闆話,仲要聽阿公阿爺的政府、國家的話,你話除左養育出太監與「狗公」等小男人的變種,又有咩出奇呢?

讀讀歷史,中國千年不變的,就係「萬般皆下品,唯有讀書高」--中國的書生和西方的知識份子最不同的是甚麼?就是中國書生大多數都手無縛雞之力,被譏為東亞病夫;西方的男性教育,講獨立之外,講榮譽,講勇氣,中國人呢?你幾時聽過港爸教「勇氣」?你幾時聽過老師教「獨立」?更加唔好講,一毫子都唔值的「榮譽」--咩係榮譽?大紫荊定係金紫荊呀?望下香港的一眾膠官,佬就有好多,承擔?擔泥就有好多!

缺乏獨立性
台灣、新加坡、南韓等「大中華文化」社會都有類似問題,但人地卻強制當兵,離家幾年當兵的地獄式訓練,令男孩成長變成男子漢--而香港偏偏不用當兵,好處是少了很多暴力,甚至減少了家暴問題,但同時間卻養育了大量長不大的男孩,講就兇狠,做就不敢,就和港女的「公主病」一樣,港男一樣有「公子病」--以往形容士大夫無能,會用「無事袖手談心性,臨危一死報君王」,今日不少港男,就連「一死報君」的意志都冇,只會逃避、只會潛水、只會「走數」而「欠數不還」!

就是嘛,活在「二代家長」的陰影之下,樓價貴似天價,遲遲都不能離開家庭獨立,港男繼續成為「大男孩」,既是自己的問題,更是社會的問題;其他三小龍的男性,最少也可以離家獨立,港男離家,絕大部份都只能寄居於天橋底,這種無助的現實,是環境造成;終極一點的,幾年來聽到唔少「大男孩」胡亂理財,最尾搞到要問女友借錢遲遲不還而因財失義的故事--溫室中的大男孩離開了溫室,往往一無是處,偏偏卻仍然自以為很了不起,說到底,還是社會的整體的悲劇,是不中不西、中國膠思維纏繞不去的無奈結果。

(下集再講番港女)

伸延閱讀:
港男港女之上進篇(第二集)
港男港女之港媽篇(第一集)
毒男與毒女(二)
毒男與毒女(一)

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀