支持及訂閱請按 Like

星期日, 3月 22, 2009

劉江華草泥馬 BNO 論

劉江華咪以為在南華早報吹水,就可以完全唔抹嘴;咩話?香港人比較喜歡使用特區護照,而唔使用 BNO 係由於「國家的驕傲」?「每一個人都感覺到當你擁有特區護照,在海外旅行時你就得到我地偉大的祖國(原文係國家)的保護?」。
South China Morning Post
EDT3 | EDT | By Ambrose Leung 2009-03-21

Interest in BN(O)passportsdeclines Legco security panel chairman Lau Kong-wah, deputy chairman of the Democratic Alliance for the Betterment and Progress of Hong Kong, said people preferred SAR rather than BN(O) passports because of national pride. "Everybody feels that once you have a SAR passport, you get the protection by our great nation when travelling overseas," he said, citing efforts by the Chinese embassy in Thailand to help Hongkongers stranded by the tsunami in 2004.

在這個問題上,事非黑白如此清楚的一件事,偏偏由記者到劉江華之流都可以指鹿為馬,作得就作;為何 BNO 得番咁少人用?有兩個好直接而現實的原因,第一 BNO 的申請費用貴,今日英磅跌到底,都仲要 $1370 去申請一本;當初英磅貴的時候,差唔多要成二千蚊一本,當兩本的功用表面上差唔多時,香港人自然好實際,去申請一本三舊幾水的特護,就係咁簡單。

第二個原因其實最重要,就係 2007 年英國才神秘地(因為好低調)宣佈,BNO 終於和特區護照睇齊,可以有歐盟全境免簽的待遇--而特區護照就早在 2001 年可以,於是特護勢強,BNO 勢弱,就是當年歐盟的護照簽證差別做成。(為何如此呢?鬧完劉江華之後,文末會解釋)

上面呢 d 鐵一般的事實,劉江華作為行政會議成員,如果唔知就非常無知!如果知卻唔講,反而出來指鹿為馬,就係無恥!而更無恥的係,劉江華作為行政會議成員,明知上年泰國機場示威,特區政府處理到亂哂龍,更有港人因而不幸喪生,無恥的劉江華對此隻字唔提之餘,仲敢大大聲舉 2004 年的泰國例子,當 2008 年的泰國例子完全無到,簡直就係無恥之極!

2008 年泰國包圍機場之時,持 BNO 找英國領使館協助,英國政府會送你走;持特區護照搵中國領使館,以及香港特衰政府協助,結果就係搞出個大頭佛!點解?因為人地的行政法規有嚴格的規定,處理不當會有後果,如果歧視仲會畀人告;中國人呢?處理衰左,由官員到政府都只會逃避責任,既沒有可以執行的法規與指標,有人歧視你,亦冇法律可以幫你告得到,更唔好講,海外的中國領使館,同英國領使館的分別--就舉東南亞為例,中國領使館的工作,似民建聯多過似使館,主要功用係統戰,係搞慶乜乜慶物物的宴會、活動,面對突發事件時的應變能力?信劉江華一成,真係雙目都會失明--「在海外旅行時你就得到我地偉大的祖國的保護」,對,例如去蘇丹、阿富汗、索馬里、北韓、以及中東各國,持特區護照的確比起任何一本西方國家的護照安全;至於其他地方,你話呢?

香港的傳媒就係連呢 d 資料搜集都唔做,港聞版都算仲好,其他咩雜誌、旅遊版的,連何處要簽證何處不用簽證的資料,都可以完全唔 update 錯哂;上年聖誕,一本著名的本地旅遊雜誌,講去芬蘭過聖誕的旅行資料時,仍然寫 BNO 要芬蘭簽證,簡直就不知所謂!

BNO 技術問題

為甚麼特區護照早在 2001 年就可以,而 BNO 卻要到 2007 年才擁有呢?明明大家都是香港人,難道歐洲各國都是傻的嗎?何況如果大家早幾年已經有持 BNO 去歐洲的經驗的話,除了在英國本土,歐洲各國的海關於實際執行上,根本唔多理你係 BNO 定英國護照,根本都當係一樣野,點解偏偏連免簽都做唔到呢?

問題就正如黃世澤當時所說,這是一個技術問題,就是犯法時護照的領使保護,與遺返安排的問題;如果香港人持 BNO 在歐洲犯法被人驅逐出境,佢地要驅逐去邊?英國佬唔肯畀 BNO 的香港人有「居英權」,因此 BNO 一直無法得到歐盟的免簽證待遇,直至 2007 年傳聞英國人暗地承諾「接收」被驅逐的港人為止。

到今日為止,BNO 內仍然有一頁,專門列出香港人的身份證號碼,以及寫上一句持有人擁有香港的居留權--原本呢個設計係天衣無縫,當年取得 BNO 的港人,英國政府當然知道佢地是否擁有香港永久居民的身份,香港永久居民就自動擁有香港的居留權 (ROA, Right of Abode),但臨時垃圾會在 1997 年修改《入境條例》,規定外流、移民的港人「如在1997年7月1日起的18個月內返回香港定居,將可保留其居留權。如他們在1997年 6 月30日後返回香港定居,但在緊接其返回香港定居的日期之前並沒有連續離港超過36個月,他們亦可保留其居留權。」--結果,就係有一堆寫住有香港居留權的 BNO 護照,因為臨立會改法律而喪失香港居留權,而大頭佛搞到最尾,就係 2007 年「傳聞」英國佬要「偷偷地」食左佢,要承擔遺返持 BNO 而被驅逐出境的港人。

就係因為咁,自 2001 年特區護照得到免簽而 BNO 沒有,一眾愛共親共傳媒立即狂寫文唱衰 BNO,另外一眾懶核對資料的記者,繼續用唔 update 的資料乜都寫 BNO 要簽證,就好似上面講去芬蘭旅行的資料,仍然寫 BNO 要芬蘭簽證,於是一眾永遠唔對資料的香港人,就繼續以為 BNO 的免簽少過特護,於是使用量和申請量繼續遠低過特護。

林忌認識兩個朋友去英國工作,佢地都唔知道原來特護去英國工作要畀錢簽工作證,而 BNO 卻可免費,更唔知道持 BNO 在英國住半年,就可以有選舉權;也唔知道持 BNO 的香港年輕人,可以申請 Tier 5 的「流動」工作簽證(唔使有公司請你就可以申請,到當地有兩年時間慢慢玩同搵機會)

另外,歐洲好多國家以及地方政府,理論上會區分 BNO 同英國護照,實際執行上卻非常有彈性,例如持 BNO 去讀書、工作甚至移民,都有唔少成功例子,可以得到歐盟國民的待遇--當然,其中一個後遺症,就係持 BNO 在歐盟購物,被視為歐盟的公民,因此冇得享受退稅待遇。

唔單止 BNO 受影響,香港續領英國護照同 BNO 的價錢係一樣的,可是連 update 網頁上的收費資料,中英文版都可以出現唔同價錢,而更離譜係,中文版係正確,出錯的居然係英文版......唔通英國領使個的網頁,外判左畀中國人做? 
http://ukinhongkong.fco.gov.uk/en/passports/fees
又有開心大發現
中共與一眾土共經常以特護免簽比 BNO 多來做文章,見討論區卻有人說一些連和台灣建交的國家(少人去),都可以有特護免簽令人驚奇,但去到發現不少只有紙上承認,實際上根本唔承認。

另一方面,英國領使館個網頁,十世唔 update 仲有好多資料都唔齊存,有些國家明明有免簽,佢又冇放落個 list 度。

British HK 的資料較新,但舊版 excel 開唔到,而且亦有些未做到盡善盡美,需要我地集體去幫手改善;林忌手痕比較一下特護同 BNO 的簽證,由 A 字母開始睇起,就發現有個好奇怪的現象,點解 Andorra 安道爾呢個位於法國同西班牙中間的小國,居然會畀特區護照免簽證,卻唔畀 BNO 免簽呢?法國同西班牙呢兩個宗主國都畀 BNO 免簽,冇理由安道爾唔畀 BNO 喎?

由於安道爾公國細到連自己國家的英文網站都超難搵,搵到安道爾於比利時的官方網站,終於有英文:http://www.andorra.be/en/8_2_1.htm

Andorra does not require a visa for ANY nationality.
However, given that to arrive in Andorra you have to go through France or/and Spain, it is important for the non-resident of the Schengen zone to know if they need a visato enter and leave the Schengen countries.


原來安道爾係全人類免簽證的!奇怪啦,點解特局護照卻特別聲稱安道爾有免簽安排呢?再上網搵搵,又有開心大發現!

「2002 年 4 月 8 日:香港特別行政區政府昨日(4月8日)宣佈,已接獲安道爾外交部通知,由即日起,安道爾給予香港特區護照持有人免簽證入境旅遊待遇,逗留期最長為三個月。目前同意給予香港特區護照持有人免簽證入境待遇的國家與地區的數目增至109個。

  港府發言人說:“我們歡迎安道爾政府的通知。給予免簽證顯示該國對我們在‘一國兩制’原則下實施有效的出入境管制,投下信心的一票。”

  發言人續說:“這是我們致力為香港特區護照持有人提供更便利的出入境安排的進一步成果。”

  安道爾位於西南歐法國與西班牙交界處。目前,安道爾國民可免簽證到港旅遊,每次逗留不超過三個月。」

好開心!特護又多一個「免簽國」,簡直就係奇蹟呀!香港畀安道爾免簽,於是安道爾覆你又免簽--特區政府就大大聲慶祝,原來其實係畀人搵左笨實,因為人地根本從來都唔需要簽證......

看看連大陸的網站中共護照乜鬼免簽都冇,於是數埋「全人類免簽」的安道爾,我真係唔明,2002 年的特區政府慶祝乜鬼?我地使唔使發新聞稿,慶祝特護可以免簽證去南極、月球同火星?如果安道爾畀特護免簽係「對一國兩制原則下實施有效的出入境管制,投下信心的一票」,咁安道爾畀中共免簽,又係唔係「對共產主義原則下... (下刪一億字)的管制,投下信心的一票?」

明白了,我地應學下特區咁熱烈慶祝!熱烈慶祝安道爾公國畀 BNO 免簽證待遇!!!普天同慶!!!麻煩 British HK 的朋友,又要 update 個 list 了!

最後一句,如果你也支持 BNO 的平權運動,請考慮對 British Hong Kong 踴躍捐款
這個小工具發生錯誤

熱門文章

這個小工具發生錯誤

最新文章

  • 當左膠變成熱狗 - 驚見「左膠御用」傳媒獨立媒體《當蔡子強變成林忌》一文,左膠不但沒有從脫離群眾,被大量原本的支持者離棄,以至被原本的同路人所質疑,以至高呼要票債票償吸取任何教訓,更反過來四圍挑起火頭,繼續人身攻擊,特別是這位當年亂寫「歧視」等法律,當年不斷亂屈「歧視法西斯」的左膠作者「稻草」。 當左膠連溫文保守如蔡子強,也要點名...
    6 個月前

最近文章

再次伸延閱讀