為何林忌唔走去分析股票呢?因為股票係戰術的遊戲,而唔係林忌喜愛的戰略遊戲,股票升跌都都係炒消息,係一個非理性的市場,即使明明值更多,卻大可以只值少少;明明唔值咁多,只要有傻佬跟進,就可以亂升,簡單而言,股票市場係硬膠的,和林忌一貫反膠的邏輯相反,叫我去貼股票,就和叫我去忍硬膠一樣,會想嘔......
記得 07 年尾起,林忌就做左末日教主,見親老友問股票樓市,就不斷叫大家走得就走,奧運後就打死都要放,畀 N 個人問過,同 N 個人講過,結果除了親人,就只有一位朋友咁大把聽完又有執行;好多人聽完,又忍唔住手落場豪賭;有人自己唔賭,身邊的至親又落場豪賭,最慘情的,係當匯豐跌至雙位數時,林忌死勸爛勸,都勸止唔到身邊的老友入市,結果而家......
其實無論市場的遊戲,都離不開戰略的制裁;睇一間公司,除左睇波幅,睇短線數據,最緊要都仲係睇清睇楚佢地的基本業務,係認真做事,定係胡作非為;搞膠的,最終都會仆直,事情證明,連香港人的最後迷信匯豐,都逃唔過搞膠的下場,無論做人定係做事,都切忌硬膠。
當全世界搞金融的國家與股市都跌到暈低果時,不妨考慮下戰略性的外匯市場;除了有排衰的英磅,升幅有限的歐羅(都冇乜跌過),贏就少少輸就雷曼的人民幣之外,有些農產或工業國的貨幣,係絕對值得考慮--美國、中國、英國都狂印銀紙,賺少少息差加匯價,作為長線投資此其時也。
他日研究投資目標時,不妨多參考一個指數,就是該公司的硬膠指數--由公司的包裝、廣告、服務、態度以至項目比重,客觀製訂一個硬膠指數;膠得愈多的公司,就愈危險,各位財經專家,不妨考慮一下林忌的小小建議。