支持及訂閱請按 Like

星期六, 1月 10, 2009

恥笑才是民主精粹

唐英年去信立法會主席 不滿有議員言詞侮辱官員
2009-01-09 HKT 18:11
曾鈺成回覆唐英件信件
唐英年致曾鈺成信件

政務司司長唐英年去信立法會主席曾鈺成,指有數名議員日前在會議期間,使用非常冒犯性及侮辱性言詞,更作出帶威脅性舉動,對官員極不公平。

政府深表關注,要求曾鈺成協助維護議會,互相尊重原則。

曾鈺成表示,當日會議已按議事規則,命令有關議員退席。


唐英年覺得長毛的動作「帶有威脅性」?唔係嘛?望下民主的發源地,今日民主的發達國家,香港的制度創始者英國國會啦,首相大人被人狂噓,被人集體恥笑都得,點解我地的偉大特首以及下三濫的廢柴官員,卻唔被人笑得,唔被人鬧得,同唔被人噓得?呢個係議會呢,定係大清的龍庭?定係唐英年覺得自己係坐緊人大會議?唐英年,你個名話哂都有個英字,唔係連英國的下議院點開會都未睇過嘛?你 IQ 唔係高到咁都諗唔起嘛?

高官同政府成日同我地講,話香港的民主政制唔成熟,望一望英國下議院的辯論就知,當然啦,人地的國會議員可以在議會內盡情高聲恥笑首相,我地的議員卻連發一句大聲少少的音,都會被人趕出議會,個問題就係呢度囉,我地的立法會大家都當係垃圾會,完全冇尊重過議員的權利,卻當我地的議員係學生,要聽膠人訓話,無論講野內容有幾悶幾膠,都可以繼續講落去,當然永遠唔會有進步。

你去英國的下議院發膠音,唔夠兩句就被人恥笑柴台;當然練得多就會有進步,官員同議員的講野水平都會因此而提升啦;反之香港的制度就係製造「人肉 MP3」,好似林公公咁,練到一身好武功,由頭講到尾就梗得,由尾講到頭,或者中間隨時選播一兩句都得,呢 d 議會未搞到好似垃圾會咁囉,o岩唔o岩?

睇下人地英國反對黨保守黨,點樣盡情恥笑首相 Gordon Brown,我到今日都唔明,點解全香港咁多留學英國的人,咁多話有海外經驗的人,咁多話自己浸過洋水的人,偏偏都寫唔出呢一點,都唔能夠把自己中國膠的「家長傳統」抹左去,點解有人講廢話,要畀佢講落去?點解連英國都唔畀膠人講膠話,我地卻要尊重膠人發膠音的權利,而冇權恥笑佢?小學生聽老師講課呀?

就正如那些批評立法會調查雷曼係「侵犯司法權」的朋友一樣,簡單而言就係對歷史無知;英國第一單股市騙案--1720 年的南海股票泡沫案,都由國會成立調查會去調查,美國果單呃人幾百億的馬多夫騙案,亦都係由國會調查,最過癮的就係一大堆人卻反對香港的立法會調查!也難怪,香港的立法會,由高官到市民都當左佢係垃圾會,甚至連議員自己都忘記了,一個真正的議會應該是怎麼樣的。結果就是我們成個香港都變埋垃圾,口話學英美,實際上仍然是那股揮之不去的中國膠精神,主導了一切。

恥笑首相片段一

恥笑首相片段二


最後一段在 Youtube 叫做 "British politics at its best" ,係反對黨主席金馬崙盡情恥笑首相的一段,恥笑到連 Gordon Brown 自己都忍唔住笑,連負責主持秩序的 The Speaker 都忍唔住一路叫 Order 一路偷笑,睇下英國的國會,再望下香港的立法會,大家就會明,咩叫橡皮圖章,咩叫彊屍,咩叫小學生聽書,咩叫做一個完全冇意義的垃圾會,浪費所有人的青春!

伸延閱讀:
美國哈佛大學研究南海泡沫案提供的英國下議院研究資料
特區忽然超英趕美
請銀行尊重宇宙
從 House of Commons 看香港立法會

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀