支持及訂閱請按 Like

星期三, 12月 31, 2008

2008 年香港十大膠聞選舉

有驚無險,2008 年的香港係多事的一年;由年頭到年尾,膠事年年有,今年特別多;來到 08 年的最後一天,只希望天佑香港,硬膠唔使我地日日講。

話時話,點解林忌渡假都仲可以出 post?老實說,林忌寫 post 是一件好快的事情;其實仲快過好多人講野,你見林忌寫乜,其實林忌個腦就係用 exact wordings 思考,雖然唔係「我手寫我口」,但卻做得到「我手打我思考」,可能更勝一籌,天曉得?

當然,下面呢個選舉就真係林忌訓得五個鐘頭鼻敏感醒來的創作啦,只係 copy & paste 都三次,事後再諗仲漏左三件事,剛好三件都係悲劇,而由於呢三件事都必定入選,所以今次選舉講明係「每日一膠」的選舉,唔係咩扮中立的選舉,就請大家高抬貴手,畀呢三件悲劇入選,成為 10+3 的選舉。

第一件驚世膠聞,就係林忌提都唔提的咩「活塞男」,「x 板男」,呢件膠事膠到全世界都知,上哂外電新聞社的報導,由美英等大國到 R 爆頭的小國都報,當然係必定入選的膠聞。林忌之前對呢件事隻字不提,一來係覺得好核突,二來係覺得佢都真係好痛以及好慘,所以善良的我居然忘記了。

第二件必定入選的驚世膠聞,就係特膠政府在泰國示威者封機場時的表現;連澳門都派了包機,香港都唔派包機,到有人死先派,而派去又冇人坐,因為人都走哂同聯絡唔上,膠成咁,唔使選啦,贏梗,所以成為第二件必選的膠聞。

物三伴事都係一件悲劇,就係明愛醫院門口的死人事件;醫院膠到冇朋友,門口有人出事都唔出去關心,呢 d 膠聞真係要有人死先有人注意到;至於其他問題,當然一如既往,講左當聽唔到,睇唔到聽唔到就繼續當唔存在,例如路牌、塞車問題,呢 d 注定繼續膠落去,等下一個不幸的人死啦,我地好希望果個係高官,令善惡終須有報。

至於其他,件件都膠力深厚;拿,陳克勤呢 d,我就唔會推薦你選啦,你選係你的事,唔好老屈我鼓吹大家選佢;今年的膠聞已經去到一個高峰,簡直就係前係古人,後有冇來者就未知,就希望特膠政府可以帶頭膠少陣,唔好再由年頭膠到落年尾--雖然,大家都知道係冇可能,2009 年,會唔會膠到連當奴都要落台呢?我真係唔知,亦真心希望唔好,願主保祐,阿們。

1. 查小欣之中學生修電腦邏輯辯正學論述:經典!陳冠希點會好似中學生咁落高登同 MK 修機呢呵?人地堂堂都係 CEO,偉大的邏輯學,點可以少得你份呢又?

2. 警方選擇性執法之鄧竟成一張相可能犯法論:一張相可能犯法,去到東亞事件走去查人點解要去提款,警方點解永遠都咁大細超呢?咦?其實呢條問題係唔係多餘?

3. 黃福全朋友熱潮--我成日打錯佢個名叫黃福佳,sorry,唔係,係福全兄,真係好就手嘛,打親都係福佳,信我,我冇心的,好邪地,次次打親黃福全呢三個字,都係打左福佳。

4. 陳冠希學中學生去修電腦--堂堂的 CEO 居然走去學查小欣講法「好似中學生」咁去修電腦,簡直就係令好失望。
係囉,豪 D 嘛,做番個 CEO,學下我地的銀行家同大商家,應該將部 macbook 就咁掟係街畀人執,壞左,修乜鬼呢,買過部啦直接!

5. 好天真好傻之阿嬌天真論--我發現,好天真好傻呢五個字,真係好好用;例如果班去內地帶動娛樂事業的兄台,不如下次對住公安講:「我好天真好傻,乜頭先果位女同志唔係因為太熱咋咩?」我相信呢招一定靠得住,信不信由你。

6. 周融報名做廣播處處長--除了大家記得佢冇學位之外,仲有咩人記得佢講乜呢?除左呢大半年佢幫政府幫得好辛苦之外,大家又記得佢講過乜呢?算把啦!

7. 1980 年大公報社評:奧運就係政治!--大公報有時都幾天真,幾傻。

8. 勿把奧運政治化,卻把奧運變成愛國騷--信佢果 d 友仔,就真係天真得可愛啦

9. 持有外國護照的愛國聖火系列--咦?佢地返左祖國服務國家未呢?

10. 考評局之潛水怕屈機試題--經此一役,考評局的聲望再次跌到新低點,教你一招,就係明年拿段墨子出來,教人解釋咩叫膠。

11. 曾憲梓坐輪椅推聖火--唔使多講,睇一次就想掟爛個電視一次,老老實實,有冇覺得佢好似解剖外星人裏面果 d 外星怪物?

12. 民建聯色盲愛國服裝--信佢一成,雙目失明;事實證明,民建聯信自己少過一成,最多都係 5%。

13. 地震局之「震情保密培訓班」--地震局自己網頁的內容,鐵證如山,有幾膠你自己諗了。

14. 特膠政府高薪請副局長及局長助理--事隔半年,我地偉大的副局長同局長助理,做了乜呢?係唔係應該開張成績表畀佢地呢?

15. 持外國護照之愛國副局長--我真係唔明,點解中華民國的立法院議員被踢爆有外國護照要辭職,而我地偉大的中華人民共和國特別硬膠行政局的副局長,卻唔需要辭職。

16. CEN 篡改莎朗史東言論之字幕--事實證明,原來好多香港人唔識、唔肯、懶聽英文原文,就係果班成日口口聲聲話傳媒不可信的人,偏偏對某些傳媒信到十足十。

17. 港人「自身需要」之百幾億「地震稅」--百幾億呀大佬,最昂貴的一課膠,你畀呀?百幾億可以起多幾條隧道,製造多唔知幾多個職位,救助到唔知幾多個老弱傷病人士,點解要強制我地捐錢呢?

18. 奧運連串「咪嘴造假」事件--創了歷史先河,拿位美麗的小朋友後來到了香港唱 live... oops... 果然,名不虛傳!

19. 消失的劉翔--愛國膠集失望事件--其實,邊個係劉翔,仲有幾多人記得呢?五年後?十年後?

20. 何可欣一年長大三歲;由何可欣到易建聯,證明左祖國的時空可能違反了愛因斯坦的相對論,又或者祖國發展秘密武器,可以令時間停頓或者加速進行!立即長大又得,逐漸長大亦得!得左!

21. 睇奧運變左睇國歌--老老實實,唔好迫我改心繫膠國系列,雖然人的忍耐力係有限度的。

22. 內地旅客之中央政府打救香港人言論;下次我地應該教佢,廣東話「打救你」點解,我真係好想打救你呀!

23. 史上最爛之 MV-- Reginababy--事實證明,William Hung 的歌聲配上佢原片,效果都仲更加好,收視都仲更加高,Regina 你多多少少都 sponser 下我的製作費同醫藥費呀唔該。

24. 陳克勤 Try our breast;成功擊敗所有潮語成為潮語冠軍,克勤果然帶動潮流,成為男人的恩物,女人則避之則吉。

25. IT 膠人當選立法會議員--sorry,我連佢個名都唔想提,too....too old too seven, oh no, really too seven!

26. 國家免檢奶粉飲到人生腎石--事實再一次證明,膠國乜都可能發生;事實再一次證明,信膠國或者 X 建聯一成,唔係盲就係生腎石呀大佬。

27. 神舟七號未來報告--未起飛就寫好報告--未出發人地至多先興奮;膠國卻連見到乜都可以預言出新聞稿,證明左佢地人人唔係用眼部來睇野,可能用 X 眼,或者 X 眼通。

28. 雷曼 mini-bond 原來唔係 bond,正如迷李老母唔係老母,正如特膠政府唔係政府,而係一堆膠。

29. 王維基十日維新失敗--古有王安石、張居正、康有為梁啟超;今有王維基、中聯辦與一堆土共膠人,為中國膠再次乾杯!Cheers!

30. 倪震周慧敏問責分手去結婚--倪震咁樣「問責分手」,其實係唔係支持董建華「問責回朝」的暗示呢?

31. 一國兩制玩完之澳門一再拒絕香港議員入境--各位有外國關係的朋友,呼籲杯葛特膠政府官員外訪啦!

32. 民建聯成功爭取領匯上市狂加租--記得大家第日印出來遊街,肯定好好睇。
這個小工具發生錯誤

熱門文章

這個小工具發生錯誤

最新文章

  • 當左膠變成熱狗 - 驚見「左膠御用」傳媒獨立媒體《當蔡子強變成林忌》一文,左膠不但沒有從脫離群眾,被大量原本的支持者離棄,以至被原本的同路人所質疑,以至高呼要票債票償吸取任何教訓,更反過來四圍挑起火頭,繼續人身攻擊,特別是這位當年亂寫「歧視」等法律,當年不斷亂屈「歧視法西斯」的左膠作者「稻草」。 當左膠連溫文保守如蔡子強,也要點名...
    4 個月前

最近文章

再次伸延閱讀