支持及訂閱請按 Like

星期五, 11月 14, 2008

董建華風華再現

特膠政府雷曼膠 show 玩足兩個月,推倒了雙十節的「內務委員會調查委員會」,卻換來更有權力的「權力及特權法案」的調查會,越玩越膠自己搵自己笨實,使老董的八萬五駝鳥政策風華再現,令人嘆為觀止。

特膠政府與一眾銀行膠,心態就有如當年的董建華,又或者百幾年前,面對英法聯軍的兩廣總督葉名琛,最愛奉行的政策,就係「不戰不和不守,不死不降不走,相臣度量,疆臣抱負,古之所無,今之罕有」--百幾年前的「今之罕有」,至今已經變成了「老奉常態」,由外傭稅、東亞擠堤、中大學生報、廿三條等等見得到的,呢班大帝只係得一招,就係一味靠嚇--嘩!影響香港的金融中心地位呀!嘩!影響經濟呀!嘩!影響民生呀!嘩!影響健康呀!嘩!影響法治呀!凡係政府想推行果樣野,凡係政府唔想關心你果樣野,佢都會舉出一大堆似是而非的膠論,再搵一大堆貌不似人君,狗頭狗腦的茂利出來,先一輪廢話攻勢,再一輪黑社會收陀地一味靠嚇的攻勢,希望可以靠嚇就過骨。

膠政府嚇下嚇下好過癮,卻忘記了最基本「狼來了」的故事,就有台灣果邊阿扁講得膠野多,聽到大家都慣哂一樣,膠官日日出來發膠音,膠到大家已經麻木;我理得你聽日阿媽跳樓阿爸跳海阿婆著草阿爺去賣咸鴨蛋,總之今日唔該找清條數佢--次次都搵爛藉口去走數,你估大家弱智o架?你係唔係侮辱市民智商先?十月十日廿一票支持議案,到十一月十二日四十七票支持議案,越搞越膠者,就係呢班膠人最愛的爛招「寸步不移」,唔好移囉,一腳就飛你落大西洋啦膠人!

一大班銀行膠唔該回應一下,為甚麼英國可以有 Fraud Act 2006 這樣強力的法例,卻絲毫未聽過這些銀行要撤出英國,也未曾聽過港府在雷曼事件上,肯說出半句要參考英國的立法的「人話」?反過來,由一開始就「寸步不移」,結果政治零蛋,同大清帝國的膠人一樣,要等天收都唔識退讓,換來的只是一個更大的羞辱。當一開始民意仍在銀行與政府手上的時候,當政府與銀行都知道,事情的最大關鍵,在於先解決了大家最不能接受的那些案情的時候,如果特膠政府拿出半點處理甚麼迪迪尼案,甚麼陳冠希淫相案,甚麼東亞擠堤案的半分辦案精神,立即對那些最離譜的案例進行刑事調查,然後搞清相關責任,說得好聽點,就是主動拆彈,用他們愛聽而非常難聽的低能字眼,就係「分化苦主」,以免能量不斷積聚。可是頭一個月特膠政府做了甚麼?既沒有「雷霆萬鈞」去調查,也沒有宣佈要修改法律漏洞,以為賠錢就可以了事,就可以當一切都不發生過,結果銀行心不甘情不願又唔想賠錢,政府又不敢強力迫人賠錢,同時又製造了一個假象令苦主以為人人都有得賠錢,當一切都成空果時,只會迫人跳樓迫人自焚,簡單來說,就是特膠政府自焚!如斯的政治智慧,真係令觀眾人人 O 嘴,永不落空,同望番百幾年前班清朝大膠官一樣,真係以為自己入左時光機,睇緊 Back to future 3...

最悲哀的,呢班友就好似蠻牛一樣,做乜都只識得一招就係蠻幹,衝呀!殺呀!心口掛個勇字呀!與天鬥!與地鬥!與人鬥!其樂無窮!人定勝天!真係人蠢冇藥醫,醫番都哂醫藥費,如果送去維港堆填,立即把成個維港填平矣。

一大班「半截狗雄」,就是香港淪落到今日田地的主要原因;香港與中國已經進入準革命的形勢,隨著明年的經濟進一步衰退,膠戲連場有排睇,問題係,你仲有冇眼睇?

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀