支持及訂閱請按 Like

星期一, 10月 13, 2008

新投資產品:迷李老母推介

受香港證監會所啟發,林忌決定銷售一種全新的投資衍生工具,它的名字,叫做「迷李老母」,英文則為 (mini-mum)。

正如迷李債券唔係債券一樣,迷李老母都唔係老母,而只係同老母掛勾的東西;點樣掛勾呢?其實就係同曾特首老母、任總裁老母、以及一眾特區高官的老母一齊掛勾,詳情就好似迷李債券同一籃子藍籌股掛勾一樣,至於點樣勾、同點樣勾勾佢地老母,呢一刻小弟都未係好清楚,但有興趣可以向各大銀行銷售人員的老母問候一下、兩下、甚至一百下,保證佢地會同大家講,曾特首的老母呀、任總裁老母呀,全部都係 AA 級別,風險極低。

睇完壹周刊之後,林忌發現「迷李老母」,一定要同呢位人兄的老母掛勾,佢就係「迷李債券」的傳奇人物李建平先生。根據壹周刊報導:李建平是另類投資基金公會(香港)的主席,更是證監會(SFC)的諮詢委員會委員。李建平任職新鴻基金額資產管理業務部行政總裁,而「新鴻基金融,則是香港首間設計迷李債券的金融機構,在其公司網站的業務介紹上,還自誇為「the pioneer of Minibond products in Hong Kong market」 (發行迷你債券的先驅者)。由 2003 年至今,新鴻基推出了一共三十六個迷你債券系列,累計認購額超過一百四十億港元。

壹周刊的報導還指,李建平懂得把複雜的迷你債券化繁為簡。迷你債券牽涉信貸掛公司、擔保公司、發行,還包括衍生工具及掉期合約,但李建平以往向外界推介時,就把迷你債券簡略為拆散了的債券,就好似林忌而家同大家講,迷李老母同一籃子的老母掛勾,果一籃子名人的老母作育英才,養出了這麼多名人偉人,因此購買迷李老母,就好似同時擁有這麼多個老母,同時同這麼多個老母掛勾,又或者最起碼,就好似拆散左了的小老母一樣,畀你同樣的溫暖。

係囉,唔知證監會批唔批林忌推出迷李老母上市場發售呢?點解證監會批准「迷李債券」以「迷李債券」的名義出售呢?你話「迷李老母」唔夠「投資味」,我可唔可以叫「迷李銀紙」、「迷李政府公債」、「迷李定期存款」、「迷李李嘉誠」去出售?

係囉,點解寶藥黨賣藥係犯法,但係銀行賣「寶債券」係合法呢?點解苦主老母個仔買的「迷李債券」原來唔係債券,而相反其他老母走去買的「存款證」(Deposit Certificate) 卻原來反而係債券? 個名有個 bond 字,原來連 James Bond 都唔係,又或者樣衰十萬倍的 Austin Power 都唔係;個名有 Deposit 個字,原來卻唔係 Deposit,係冇出現過的 bond? 咁網上果 d 釣魚網站,例如咩 HXBC 呀,Chinabangs、Chinagangs 呀,點解犯法呢又?唔通佢地錯在冇改名做 mini-hsbc, mini-chinabank?

朋友,睇來各路人馬捉錯路,你鬧任志剛做乜?真正值得大家迷李老母的,疑似係呢個自批、自賣、自迷李的證監會的朋友呢。

唔得,我真係好想賣「迷李老母」,特別想同一眾高官的老母掛勾,唔知大家有冇咩銷售渠道呢?

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀