支持及訂閱請按 Like

星期一, 10月 06, 2008

強迫金與最低工資寶藥黨

這個世界有很多寶藥黨,寶藥黨最叻就係巧立名目,以假亂真,用假貨來替換真貨,來呃那些天真無邪的人。

不要說遠了,就說十年前強迫金的往事吧!為何政府「大發善心」,推出退休保障呢?當然很多有識之士都認為,強迫金是假貨,可是敢企出來大大聲拒絕假貨的,有幾多人呢?有多少在旁吶喊的,還不是認為:「有,總好過冇」。

錯!寶藥黨賣寶藥,就係賭你有會有僥倖的心理,望你博負碌,希望你相信時來運到!於是中央公積金的聲音沒有了,退休保障也沒有了,只有一個假貨,就係強迫人人自己供款,結果人工不增反減的強迫金制度,你肯收貨嗎?

就是嘛,政府一路以來,都是用這樣的技倆--你想要退休保障,佢就推個假的強迫金去引你上釣,多少真心膠以為強迫金可以保障到自己,到頭來原來係令你的情況更差,一個月冇左 10% 收入,去養班幫你輸錢的經紀中介人,用自己的錢去掟自己的腳,邊有咁笨實O架?世界就係咁可愛,就係有咁多人咁笨實,所以呢個邪惡政府先可以生存到今日。

就是這樣,當你提出要民主的時候,2005 年政府就提出一個政退方案,用甚麼直選增加議席,區議會代表增加民主成份為引誘,去昆大家上勾;林忌唔想重提舊事,不過當時有幾多個學者同文化人,還不是成為了寶藥黨的受害人,齊齊中招嗎?明知對方信用差,卻經常真心相信對方會做善事,結果又係成為了寶藥黨的下一個受害人。

好了,這個事事親疏有別,日日被踢爆官商勾結的福佳政府,今日跟你說,他會推行最低工資,唔知今日有幾多「好天真、好傻」的朋友,會相信政府的立法動機係為左保障勞工呢?為何咁多件事佢地唔肯選擇,偏偏選擇一個「最低工資」?你相信呢班大商家,會突然決定做善事嗎?你相信以「有腦」出名的梁振英先生,會突發善心上無線同你講一百萬人的故事,要關心基層生活嗎?

答案很簡單,就是這個最低工資是假的,是用來呃大家上釣的寶藥--天真可愛的你總會說:「有,總好過冇嘛;而家唔好,未慢慢修到佢好囉!」

記得強迫金的故事嘛?記得保安及護衛條例嘛?記得建築物條例被玩到謝的立案法團問題嘛?記得二千年廢市政局果時,應承話會加強民主同下放權力的承諾嘛?記得北京申奧時話會改善人權嘛?慢慢修到佢好?抵你畀人呃一世囉!過左海就係神仙,事後睬你都傻!

呢個騙案,永遠都係相同的模式,首先,搵班學者、名人、高官出來,講話佢地好關心你的生活,好關心的方法,就係要實施某某政策,但果項政策,根本唔會做得到佢地表面承諾會做到的事,但透過不斷的密集洗腦,令到你相信:噢,原來買 A,就會得到 B!

係囉,當年支持強迫金的人,今日敢唔敢出來大聲叫:「我成功爭取強迫金!」,又或者出來為自己當年的硬膠道歉呢?半個都沒有,大家齊齊潛水,齊齊恬不知恥地,繼續昆你買多幾件,就好似寶藥黨咁,一件貨唔得?買多粒啦,保證有效!再唔得?食夠三粒啦,當你食到第 N 粒果時都唔得,想搵佢晦氣果時,佢已經消失左,你永遠都搵唔到佢出來追佢數。

所以,你信唔信曾特首及一眾商家,會突發善心去推動最低工資,去改善你我他的生活?係囉,點解咁順攤,點解佢地肯應承你,推行最低工資呢又?

原因,就係最低工資根本唔會有效,就正如外傭表面上有最低工資,實際上大量外傭被中間人屈左一大筆去,又再被我們香港的一班無良顧主屈左去,結果有用嗎?

冇用事少,正如對方推行強迫金的往例,唔單止冇用,仲要從中取利;簡單而言,就係以此為名,名正言順、理所當然、一鼓作氣,可以唔需要再理大家的觀感--好呀,政府推行最低工資嘛,而家大條道理,公司冇錢,所以要裁員!

你告我裁員呀笨?你立法強制禁止我裁員呀笨?你立法強制我派錢畀人呀笨?

呢個就係為何佢地肯應承你的目的--正如 80 年代為何中方肯在基本法上寫附表二,甚麼如需修改,只需要立法會三分二多數一樣,全部都係寫出來呃你上釣的玩意。

肯相信最低工資救得到你與我,肯相信政府推出來係為左你同我的,真係好天真,好傻。

一日雙方的地位不對等,要靠政府制訂工資,希望改變呢個生態,簡直就好似天方夜談,正如相信今日的社會冇民主可以有民生一樣,膠到冇朋友。 

開個最低工資出來,訂得高,裁員、改變商業模式,令更多人失業;訂得低,反而引誘老闆減人工,齊齊向同一個最低標準看齊。

政府就係睇死大家實上釣,所以才敢開出這張假關心勞工的支票,而最悲哀的,就係有這麼多人,仍然對事實視若無睹,幻想政府做善事。

真正要勞工權益,請支持集體談判權,而不是最低工資;政府就係希望你收左個假貨最低工資,以後永遠收聲,到時啞子吃黃蓮,有苦自己知。

強迫金的苦主呢?苦主去左邊?點解畀人呃完一次又一次?你傻的嗎? 

敢企出來說真相,永遠都左右不是人,膠飽佢好了!

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀