支持及訂閱請按 Like

星期五, 8月 01, 2008

毒男與毒女(一)

袁彌明博客談得興高采烈,應部份人要求,林忌也來參一腳,把毒男毒女的硬膠心態與行為,分析一番。

首先恭喜你,林忌認為毒男與毒女,都是有藥可救的;天下無不可解之毒,只有不肯軟化的硬膠;凡毒男與毒女,之所以毒到冇男女朋友,原因就有一個,就係硬膠到拒絕解毒,堅持毒到底,就和香港成街的硬膠一樣。

朋友叫林忌寫呢個題目,林忌一直拒絕,原因就係毒男與毒女,係世上最會拒絕食藥醫病的動物--原因係腦部出左問題,明明太陽由東邊升起,佢地相信由西邊升起;明明地球係圓的,佢相信係方的,所以講乜野都冇用!由於毒性太深,腦部功能失常,基本上同植物人一樣係冇得醫;而萬幸的,幸運的毒男毒女,突然好似長期昏迷的病人,突然一朝醒覺,忽然肯相信地球係圓的!而本文就係為左呢班突然有得救的人而設。

袁彌明那篇文章最 amaze 林忌的地方,就是 Erica 果句:「要有計劃,有 strategy。我告訴你哪些事該何時做,哪些事絕對不可做… … (下刪 100 字)」--金石良言,做人處世,吃飯排泄,做乜都應該有計劃,做乜都必須有 Strategy--男女關係當然都要講戰略啦!好煩?乜要用腦好辛苦?做猩猩食蕉都要講 Strategy 啦,何況係做人?唔想講戰略,跳樓囉,咁就一了百了啦(幫你執屍果個辛苦囉,要用 strategy 來執骨,下刪一百字.......)

(題外話,男女感情都要講 Strategy 啦,點解從政班友從來都唔講?你問我我問邊個?)

中國人成日同你講,孫子兵法果句:「知己知彼」--但係事實上從來都講得出,做唔到;凡係毒男毒女,照鏡果時都會講:「咦?我呢度、果度...由 e 道至印度都好靚、好吸引呀!點解成街的友仔都唔識貨?」

毒男同毒女的常犯戰略問題,第一個就係永遠睇唔到自己的缺點,亦永遠睇唔到對方的優點與缺點,把對方的優點視作缺點,把對方的缺點視作優點,於是毒下毒下,咁又一年半載啦;以林忌觀察所得,最毒的男女,有三分一確是賣相奇差,有三分一則為內涵奇差,而還有三分一,卻真的是包裝奇差引致--只要肯改,問題就可以得到解決(當然,問題在於,一早肯改的,就唔係毒男毒女啦;所以九成九,都唔會肯改)。

絕症一:不知己
最經典的毒男毒女,就係《神雕俠侶》的廣大愛好者(咩話?除非你係外國留學/外國長大/中文奇差,你未睇過金庸的神雕?唔怪得你毒到冇朋友啦)。毒男人人都想追小龍女,毒女人人都想被楊過追;這種劇毒心態,由 X 夢園小說,到日本 AV 都反映了問題的嚴重性;從前沒有 AV,沒有 X 夢園,沒有極級的化妝術,沒有波子 Benz、 Tiffany、Agnes b 與 Burberry,於是毒男毒女的眼角,沒有今日的高,毒性發作果時,亦沒有今日的傷也。

根治良方:先照照鏡,再照照鏡,再望一望自己的學歷、金錢、社會地位,再打個 X 折(由一折到九折不等,由於你一定唔服氣,所以不妨由 9 折開始減價,慢慢減到「解毒」為止),然後再諗清楚十次(唔該,真係數十次),你期望一個咁身世的人,想要個點樣的對象?咩話?你想嫁入豪門做少奶奶?咩話?你想娶個港姐賣相的對象?唔該,幫自己打一折啦。

絕症二:不知彼
不知彼分為兩大類,一為「好條件」毒男毒女,二為「弱條件」毒男毒女,由於大家都認為自己係好條件,所以由好條件開始講起:

好條件者:
最天真可愛純真無邪的毒女,經常掛在口邊的,就是「個個男人都係賤人」--原因呢?下一句就開始好笑了:「點解冇男人可以關心、呵護、無微不至、真心的對我好,而對我冇野心企圖,大方忍耐包容,唔會亂發脾氣亂呷醋?」--有,你阿爸囉!(題外話:1. 所以有人戀父 2. 有部份禽獸父親不在此限)

同呢類毒女相處多,你就會發現,原來所謂的好,就係無條件的金錢、首飾、飲飲食食的奉獻,包食包住包接送,隨時 on call 隨時取消的觀音兵部隊,而最悲哀者,就係毒女對觀音兵無私的奉獻永遠有期望,毒男就自我欺騙,覺得有得做觀音兵好過冇--於是雙方都永遠地毒下去......

最天真可愛純真無邪的毒男,就以為自己既有學識,外型又唔差,就會有美女送上門--這類美女既大方得體,又可愛又專一,又有學識又唔會叻過你,又係賢妻良母,又同時間擁有 AV 女星的樣貌身材與美德云云......最可笑的「迷信」,就係以為「唔化妝」的女人先至靚--有冇咁的女人?有,果個未你阿媽囉!

靚的女人只有兩種,就係化左妝你覺得靚,同埋化左妝但你唔知而覺得好靚;世界上係冇唔化妝而靚的女人的--你唔信?毒多幾年啦老友。

弱條件者:
男愛美女,女愛身份地位財產安全感,這是遺傳學的設定,有冇例外?有,正如有人中六合彩頭獎,你中左未呀?發夢係冇用的,要立即拿出實際行動去改變,否則等到天荒地老,老唔會有楊過或者小龍女出現的。

唔該唔好再迷戀明星了!告訴自己,唔好期望白馬王子或者白雪公主,連黑馬公子同靚 d d,純 d d ,可愛 d d 的都唔好期望,打自己兩掌同刮自己兩掌,再沖個凍水涼,再照照鏡,或者幫助到你。

根治良方:
分別閱讀十次《男女大不同》、《為何男人不聽,女人不看地圖》、《精子戰爭》、《嬰兒戰爭》,直至你明白異性同你分別為止--男人,和女人,就有如 Windows 與 MacOS 的不同,是結構性的;即使身邊的「兄弟」或者「姊妹」如何支持你,結果是不會有任何分別的,醒下吧!

反應良好就加推,冇人應就唔寫啦......

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀