支持及訂閱請按 Like

星期日, 12月 23, 2007

洗衣街重建--為旺角製造更多塞車?

洗衣街打造體育用品城

市區重建局宣布,啟動總成本達31億4,000萬元的洗衣街重建項目,打造「體育用品城」,以強化地區特色,預計2013年落成;並成立香港首個體育名人館。

項目的收購政策採取3項新措施,包括提供高達50萬元的額外營商特惠津貼,以及優先以市值租金租賃體育用品城的零售舖位。

「體育用品城」提供約88,800平方呎的零售及文娛康樂樓面,以及15萬平方呎的住宅用地;並提供多樣化的體育用品和與體育有關的不同類型服務,例如娛樂、健身、適合一家大小的互動模擬運動、健康護理和健康食品等。

諗極都唔明,點解旺角咁旺咁迫人,多車到咁,連地鐵站都塞爆,都仲要「重建」。政府係唔係想旺角「更旺」,更加迫爆呢?

諗來諗去,都唔明白市建局「重建」波鞋街,有咩咁「迫切」,「迫切」到唔重建好似會死咁,比起塞車、環境問題更加重要;如果大家有留意旺角的地理環境,就會發現旺角東南區,擁有大旺小巴站頭,再加上係其他貨車、小巴落客的地點;以目前西洋菜南街「迫爆」,行人專用區人車不斷為路面競爭的同時,點解仲要把波鞋街「重建」呢?重建後的人流車流會更多定係少?咁到時塞到死的情況會唔會惡化?市建局又會唔會重建埋附近的連接道路呢?

當然唔會,市建局呢類「搵錢機構」,「搵錢大過天」用法例強迫人地搬走,去「重建」他人的私人產業,就惡過慈禧太后;反之,唔知點解就冇「道路重建局」,去強迫中信泰富賣出手上的隧道股份,俾政府去「重建」。

相對於旺角幾條街的重建迫切一些,定係重建香港的道路網迫切一些呢?看來是搵小市民的錢重要一些。

對於把塞車責任全推給私家車的朋友,有一條道路一定要介紹你們認識;一架車由紅隧出西九龍走廊,行去葵涌貨櫃碼頭的話,就要經過一條限速 50km,只得一條行車線的「加士居道」天橋。

呢條橋最經典係,幾乎全部都係貨車,由朝幾乎塞到晚,葵涌來回舊隧,原來就係靠呢條「偉大到爆」的單線行車天橋,設計成「單線行車」,可知有幾舊;拿,唔關私家車事呀,唔通電子道路收費,可以令貨車唔送貨去香港島?

行西隧?唔計隧道費(如果冇第四條海隧出來爭,政府唔知要出幾多錢,先可以回購呢?)全部塞在中環的時間,會唔會比起塞舊隧更耐?點解西隧分流失敗?因為有邊個送貨去西環?西環去中環都塞爆,行來做乜?

當波鞋街重建之後,當新政府總部落成之後,你估旺角同中環,會唔會比起今日更塞呢?重建製造更多塞車同環境問題,真係好環保,真係好關心民生。

點解中環--灣仔繞道一拖再拖?未係因為名義上係起路,實際上起更多的樓囉!起樓永遠行先過起路,你話塞唔塞呢?

政府真係有決心解決問題,不如再絕 D,在政府入職條件規定,返工要坐港鐵或者巴士,否則扣人工、扣長俸,政府公務員泊車,要收取五成人工的泊車費,作為「電子公務員道路收費計劃」,比起「電子道路收費計劃」先行,保證令政府新總部,唔會製造任何擠塞!

對,如果大家有留意,逢周末、周日,政府停車場開放公眾,會多左幾多個車位出來時,就會發現,原來政府員工有咁多人開車,有咁多車係政府車!咦?如果佢地全部帶頭坐港鐵同巴士,未唔使搵小市民開刀囉!

定係原來電子道路收費,所有政府車的費用都由政府出呢?果然同市建局的邏輯一樣,錢就佢搵哂,命就你地賠!
這個小工具發生錯誤

熱門文章

這個小工具發生錯誤

最新文章

  • 當左膠變成熱狗 - 驚見「左膠御用」傳媒獨立媒體《當蔡子強變成林忌》一文,左膠不但沒有從脫離群眾,被大量原本的支持者離棄,以至被原本的同路人所質疑,以至高呼要票債票償吸取任何教訓,更反過來四圍挑起火頭,繼續人身攻擊,特別是這位當年亂寫「歧視」等法律,當年不斷亂屈「歧視法西斯」的左膠作者「稻草」。 當左膠連溫文保守如蔡子強,也要點名...
    6 個月前

最近文章

再次伸延閱讀