反過來,香港電台有沒有盡力去捍衛新聞自由呢?同樣是「聲音檔案選舉」,2006 年的「巴士阿叔」可以入選,最終更選到冠軍;反過來今次卻不許「福佳」進入提名,這不是政治審查是甚麼?
全段巴士阿叔短片充滿真正的粗口,可是香港電台照樣敢以「我有壓力,你有壓力」參加選舉;反過來涂謹申在 2007 年 6 月 20 日立法會辯論中,高唱「普選偏偏冇我,八百張飛選多一世紀」,這句說話已經寫入了立法會紀錄,為甚麼不可以入圍?
如果說《福佳》十幾個不同版本,合共超過百萬的 Youtube 點擊率,連華盛頓郵報集團旗下的網路政論雜誌《Slate》,這樣的成績,反問一下,吳邦國那一句硬膠言論又有沒有?吳儀、溫家寶的言論,又引起了多少香港人的共嗚?歐文龍案,又關香港人咩事?「神童」沈詩鈞講過乜?又有幾多個記得?港台自己就又出一個朱培慶,同時又出一個黃應士「公共廣播政策檢討」,不如廿個都係「撐港台」言論算啦,好唔好?
我林忌就係唔服,我唔會似果 d 中國膠,因為首野係自己有份,就怕俾人講話唔知搏乜;即使呢首歌唔係我林忌,係任何一位網友作的話,我一樣會照撐,正如我撐港台一樣咁撐。
如果因為係自己撐的港台,我林忌就要閉埋隻眼,對過份到咁的政治審查都視而不見,我就唔係林忌,而咁的港台亦再冇俾大家撐落去價值,right?
對,或者呢個唔係政治審查,咁仲衰,又一次證明香港電台成班友自己閉門造車,一係就冇腦反智,連涂謹申在立法會唱左,報上了傳媒都唔知;一係就成班人自己亂咁作句數就出街,完全冇關心個市民諗乜,求其亂做野就出街,類似的事情早就唔止一次,卻在今日風頭火勢之下,仍然當大家冇到。
再唔係,就以為政治審查左,自己會好過一些;在區選泛民「實幹派」如馮檢基,都俾人打到阿媽唔認得;自由黨唔係親生仔,一樣都唔放過的情況之下,仲政治白癡幼稚到呢個地步,以為自我審查就有得保命,咁就真係膠到冇人有了。
學下 Yahoo! 同八大傳媒都唔識咩?搞個公眾選舉,等公眾提名公眾投票,咁成班人未唔使上身囉--如果他們真心相信言論自由,而非只是選擇性支持的話。
送贈港台負責此事的員工一句:「高舉雙手,走出門口,陪著葉劉,回家早抖~」