隔牆有耳 -- 我們不會忘記：冇咁易俾葉劉呃全城潮玩 facebook ，《福佳始終有你》fans club 成員亦利用呢個媒介，組織惡搞葉劉行動。 Halloween 月尾至到，佢就應節，組群搞個「12 月 2 日港島鬼屋探秘」活動，仲將葉劉同撐佢許冠文、盛智文個頭，key 落嘩鬼個身度，口號係「奉海洋公園主席盛智文呼籲，全港市民用腳趕鬼！」寓意要踢走葉劉。
《福佳》又有新作
網絡世界絕對係今次補選一大戰場。除 facebook 成為串連熱點外，YouTube 亦勢將成為兩邊陣營支持者發放文宣主要渠道。早排將政府宣傳歌《始終有你》改編成《福佳始終有你》而熱爆創作人林忌，聽講亦已經密鑼緊鼓炮製緊新作，預計不日出街，唔知係咪叫《陳太始終有你》呢？另外，有網民驚香港人太過善忘，唔記得 03 年 反 23條集體回憶，所以特別 YouTube度，將《葉劉淑儀─ ─ 亂嗡 23條》呢首Rap 歌翻炒。首歌將葉太當年推 23條金句剪輯而成，包括當時佢立法會寸寸貢咁講：「又唔守規矩又冇禮貌，我唔會再答佢（涂謹申）問題」囂張金句，加上混音效果，八方聽番都忍唔住嘆一句：「不想回憶，未敢忘記。」
文章
